Qazaqstannyń Qytaımen saýda statıstıkasyndaǵy alshaqtyq problemasy áli sheshimin tapqan joq - Qarjy mınıstri
ASTANA. QazAqparat - Qazaqstannyń Qytaımen saýda statıstıkasyndaǵy alshaqtyq problemasy áli de ádistemelik jaǵynan sheshim tapqan joq. Búgin Parlament Májilisinde Qazaqstan Respýblıkasy Úkimetiniń 2014 jylǵa respýblıkalyq bıýdjettiń atqarylýy týraly esebin tanystyrǵan Qarjy mınıstri Baqyt Sultanov osylaı málimdedi.
«Qazaqstan men Qytaıdyń saýda statıstıkasyndaǵy 5 mıllıard dollarǵa jýyq alshaqtyq birqatar jyldar boıy kele jatyr. Alshaqtyq sebebi deklaratsııalaýdyń anyqtyǵyna ǵana qatysty emes. Basty sebep - bizdiń elimiz arqyly basqa elderge ketetin qytaılyq eksport. Máselen, Qytaıda birinshi qurlyqtyq shekara eksport bolyp sanalady. Al Qazaqstan úshin bul árıne ımport emes, tranzıt», - dedi B. Sultanov.
Bul rette Qarjy mınıstri problemany sheshý qajettiligin de atap ótti. Onyń aıtýynsha ádistemelik túsindirýler bolǵandyqtan, ony ádistemelik turǵydan da sheshýge bolady.
«Degenmen, bul - ekijaqty, tipti úshjaqty másele emes. Óıtkeni, bundaı alshaqtyq Qytaı men bizdiń aramyzda ǵana emes, Keden odaǵy músheleriniń arasynda da bar. Máselen, Qytaı men Reseı arasyndaǵy aıyrmashylyq 6,9 mlrd. dollardy, al Qyrǵyzstanmen 4,1 mlrd. dollardy qurap otyr», - dedi mınıstr.
Aıta keterligi, mınıstrdiń sózine qaraǵanda, Qytaıdan ımporttalatyn taýarlar boıynsha bıýdjetke túsetin kedendik bajdar sońǵy bes jylda oń úrdiske ıe bola bastaǵan.
