Qazaqstannyń Qytaı eliniń aldynda jerge qatysty eshqandaı mindettemeleri joq - Jer resýrstaryn basqarý agenttigi
ASTANA. Sáýirdiń 19-y. QazAqparat /Aıdar Ospanalıev/ - «Qazaqstanda 2,4 mıllıon gektar sýarmaly jer bar. Olardyń barlyǵyn da elimizdiń azamattary paıdalanyp otyr.
Al olardy bireýge satý úshin jerdi ıelerinen ajyratý kerek. Bizde ondaı áreketter oryn alǵan joq. Sondyqtan Qytaıǵa 1 mıllıon gektar jer beriledi degen áńgime jalǵan», dedi búgin Jer resýrstaryn basqarý agenttigi tóraǵasynyń orynbasary Qanalbek Raıymbekov. Bul týraly ol búgin BNews.kz portalynda ótken ınternet-konferentsııa barysynda málim etti, dep habarlaıdy QazAqparat.
Onyń sózine qaraǵanda, elimizde qytaılyqtar tarapynan jerdi birlesip ıgerý túrindegi nemese basqadaı bir usynystar jasalýy múmkin. «Biraq Qazaqstan Qytaıǵa jer berýge mindetti emes, biz olarǵa eshteńe de qaryz emespiz», dedi agenttik tóraǵasynyń orynbasary.
Osy sózine dálel retinde ol elimizde jer ıelenip otyrǵan sheteldik azamattardyń jáne kásiporyndardyń tizimin kórsetti. Tizimge sáıkes, qazirgi tańda aýyl sharýashylyǵy maqsatyndaǵy jerlerdiń 24 myń 681 gektary shet eldik kásiporyndar men jekelegen jáne zańdy tulǵalardyń atynda. Olardyń arasynda eń kóp degen «Agroshans» jaýapkershiligi shekteýli seriktestiginiń 5 jylǵa jalǵa alǵan jeriniń kólemi 10 myń gektar. Sonymen qatar «Aqsuńqar» jáne «Ál Sakr» kompanııalarynyń birlesken kásipornynyń 49 jylǵa jalǵa alǵan jeri 1 myń gektardy quraıdy. Kásiporynnyń quryltaıshylary Qazaqstan men Qytaı eliniń ókilderi. «Sondaı-aq AQSh pen Qazaqstannyń birlesken «Fýdmasteragro» kompanııasynda 2 myń gektar jer bar», dedi Q.Raıymbekov.
