Qazaqstannyń qysqy olımpıadalardaǵy jetistikteri
Qysqy Olımpıada oıyndary 1924 jyldan beri ótkizilip keledi. 1994 jyldan bastap qysqy Olımpıada oıyndarynyń ótý merzimi jazǵymen salystyrǵanda eki jylǵa alǵa jyljydy. Tuńǵysh Olımpıada Frantsııanyń Shamon qalasynda ótken. Atalmysh jarysqa 16 elden 300-ge jýyq sportshy qatysqan bolatyn.
Phenchhandaǵy Olımpıada oıyndarynda qatysýshy elderdiń rekordty sany tirkeldi - 93. Buǵan deıingi rekord Sochı Olımpıadasynyń enshisinde bolǵan - 88 memleket. Sondaı-aq, Ońtústik Koreıada rekordshy sportshylardyń kóptep qatysatyny belgili boldy - 2922. Máselen Sochıdegi Olımpıadaǵa 2800 sportshy qatysqan.
Sondaı-aq, Phenchandaǵy oıyndarǵa jańa alty memleket qatysady: Kosovo, Malaızııa, Nıgerııa, Sıngapýr, Ekvador jáne Erıtreıa.
Qatysýshy memleketterge qatysty kishigirim statıstıkany nazarlaryńyzǵa usynamyz.
Phenchhanǵa eń kóp sportshyny AQSh quramasy ákeldi - 240 atlet. Ekinshi orynda Kanada (226) jáne úshinshi satyda Shveıtsarııa (169). Qatysýshy sportshylardyń sany boıynsha beıresmı kestede Qazaqstan 93 eldiń ishinde 21 orynda tur.
Ońtústik Koreıadaǵy Olımpıadada elimizdiń namysyn 46 sportshy qorǵaıdy. Qyzyǵy, 18 elden Olımpıada tek bir ǵana sportshydan barsa, 58 memlekette sportshylar sany 10-nan aspaıdy.
Azııa qurlyǵynda Qazaqstan Olımpıadaǵa qatysýshy sportshylar sany boıynsha tórtinshi orynda. Al burynǵy Keńes odaǵy memleketterimen salystyrsaq, Qazaqstan Reseı komandasynan (168) keıin ekinshi satyda.
Phenchhanda 15 sport túrinen 102 medal jıyntyǵy sarapqa salynady. Medal burynǵydaı domalaq. Ońtústik Koreıadaǵy júldesiniń erekshiligi munda bári hangylda ıaǵnı koreıalyq áriptermen jazylǵan. Uıymdastyrýshylardyń aıtýy boıynşa, bul eńbek pen sportshylardyń maqsatyna jetýin bildiredi.
HOK aldaǵy Olımpıada oıyndaryna jańa alty sport túrin engizdi - bul snoýbordtaǵy bıg-eır (erler, áıelder), konkı tebýden mass-start (erler, áıelder), kerlıngten dabl-mıkst jáne taý shańǵy sportynan komandalyq saıys. Esesine, Olımpıada baǵdarlamasynan snoýbordtaǵy paralleldi slalom saıysyn alyp tastady.
Medaldar myna sport túrleri boıynsha sarapqa salynady:
1. Bıatlon (11)
2. Bobsleı (3):
Skeleton (2)
3. Kerlıng (3)
4. Konkıden sport túrleri:
Konkı tebý sporty (14)
Mánerlep syrǵanaý (5)
Short-trek (8)
5. Shańǵy sport túrleri:
Taý shańǵy sporty (11)
Shańǵy qossaıysy (3)
Shańǵy saıysy (12)
Tramplınnen shańǵymen sekirý (4)
Frıstaıl (10)
Snoýbord (10)
6. Shana sporty (4)
7. Shaıbaly hokkeı (2)
Phenchhandaǵy Olımpıada oıyndarynyń tumary bolyp jolbarys Sýhorang (Olımpıada) pen aıý Pandabı (Paralımpıada) tańdaldy.
Ońtústik Koreıa Olımpıada oıyndaryna oraı birneshe úlken sport nysandaryn saldy. Olımpıada Phenchhan men Kannynda ornalasqan 12 sport kesheninde ótedi.
Sporttyq nysandar:
Olımpıadylq Hvenge parki
«Alpenzııa» tramplınnen sekirý parki
«Alpenzııa» bıatlon ortalyǵy
«Alpenzııa» shańǵy ortalyǵy
«Alpenzııa» shana sport ortalyǵy
«Enphen» taý shańǵy sport ortalyǵy
Phenchhandaǵy olımpıada qalashyǵy
Jabyq muz aıdyn
Hokkeı ortalyǵy
Kenpho Ovaly
Kenpho muz aıdyny
Kvandon Ýnıversıtetiniń sport arenasy
Kannyndaǵy olımpıada qalashyǵy
Chýnbon
Býgvan Fenıks Parki
Phenhchandaǵy qysqy oıyndar Qazaqstan úshin jetinshi Olımpıada oıyndary bolmaq. Bizdiń komandamyz 1994 jyldan beri qysqy Oıyndarǵa únemi qatysyp keledi. Bul ýaqyt aralyǵynda Qazaqstan bir altyn, úsh kúmis jáne úsh qola júlde ıelendi.
1994 jyly Lıllıhammerde (Norvegııa) qazaqstandyq shańǵyshy Vladımır Smırnov Olımpıada chempıony atanǵan bolatyn. Buǵan qosa, Smırnov eki kúmis júlde alǵan edi. Vladımırdiń bul jeńisteriniń arqasynda Qazaqstan jalpy esepte 12 orynǵa jaıǵasqan bolatyn. Norvegııaǵa Qazaqstan atynan 29 sportshy barǵan.
1998 jyly Naganoǵa Qazaqstan 60 sportshy apardy. Olımpıadanyń qorytyndysy boıynsha otandyq sportshylar eki qola medal enshiledi. Konkı tebý sportynda Lıýdmıla Prokasheva men shańǵy saıysynda Vladımır Smırnov qola júldeger atandy. Osylaısha, Qazaqstan jalpy esepte 20-ny oryndy ıelendi.
2002 jyly Solt-Leık-Sıtıge Qazaqstannan 52 sportshy qatysty. Ókinishke qaraı, Amerıkada otandyq sportshylar júldeli orynǵa iline almady.
Araǵa tórt jyl salyp Týrınde de Qazaqstan joǵary nátıje kórsete almady. Italııaǵa barǵan 55 sportshymyz úıge júldesiz oraldy.
Esesine Vankýverde Qazaqstan kópten kútken medalǵa qol jetkizdi. Bıatlonnan 15 shaqyrym qashyqtyqqa saıysta Elena Hrýstaleva kúmis júldeger atandy. Bul Olımpıadaǵa Qazaqstannan 37 sportshy qatysqan bolatyn. Jalpy esepte elimiz 25 catyǵa ornalasty.
2014 jyly Sochıdegi Olımpıadaǵa Qazaqstan 51 sportshyny apardy. Reseıdegi oıyndardyń qorytyndysy boıynsha Qazaqstan bir qola medal ıelendi. Mánerlep syrǵanaýden Dennıs Ten tarıhı júldege qol jetkizdi. Jalpy esepte Qazaqstan 26 oryn aldy.
Phenchhandaǵy Olımpıada oıyndarynda Qazaqstan burynǵy nátıjelerin qaıtalap qana qoımaı, ulǵaıtýy da ábden múmkin. Sol úshin aldaǵy Olımpıada oıyndarynda el namysyn qorǵaıtyn sportshylarymyzǵa sáttilik tileıik!
Phenchhandaǵy Olımpıada oıyndary resmı túrde erteń bastalyp, aqpannyń 25-sine deıin jalǵasady.
