Qazaqstannyń qylmystyq saıasatty izgilendirý trendi barynsha turaqty
ASTANA. QazAqparat - Qazaqstannyń qylmystyq saıasatty izgilendirý trendi barynsha turaqty. Bul týraly búgin elordada ótip jatqan «Ortalyq Azııadaǵy jańa qylmystyq-atqarý zańnamasyn qalyptastyrý: úrdister men talaptar» atty aımaqtyq konferentsııada QR Bas prokýrorynyń orynbasary Jaqyp Asanov málim etti.
Onyń atap ótýinshe, qazaq eli táýelsizdigin alǵan kezeńde túrmelerdiń lyq tolýy, sottalýshylardy otrıadtyq barakta ustaý, gıgıenalyq talaptardyń saı bolmaýy, abaqtylardaǵy ólim-jitimniń kóptigi syndy kóptegen problemalarymen betpe-bet keldi. «80-shy jyldardyń ortasynda 100 myń qazaqstandyqqa shaqqanda sotalýshylardyń sany 676 adamdy quraǵan edi. Bul búgingi kórsetkishten 2,5 esege artyq. Al 90-shy jyldardyń basynda KSRO-nyń 700 myń sottalýshysynyń 100 myńy, ıaǵnı árbir 7-shisi jazasyn bizdiń elimizdegi túrmelerde ótedi», - dedi Bas prokýrordyń orynbasary. J.Asanovtyń sózine qaraǵanda, 96-shy jyly Qazaqstannyń túrme ındeksi álem boıynsha AQSh jáne Reseı Federatsııasynan keıingi 3-shi orynda boldy. Al mundaı jaıttyń oryn alýyna keńestik qýǵyn-súrgin saıasatynyń qazaq elin lagerler aımaǵyna aınaldyrýy naqty sebep bolǵan edi. «Ótken 20 jyldyń ishinde Qazaqstannyń túrme ındeksi 3-shi orynan 35-shi orynǵa deıin óz ustanymyn jaqsartty. Ol úshin ondaǵan zań qabyldanyp, 7 raqymshylyq jasaldy. ıAǵnı, Qazaqstan tańdap alǵan qylmystyq saıasatty izgilendirý trendi barynsha turaqty», - dedi ol.
