Qazaqstannyń qylmystyq-quqyqtyq salasyn úlken ózgerister kútip tur - A. Shpekbaev
ASTANA. 24 qańtar. QazAqparat - Qazaqstannyń qylmystyq-quqyqtyq salasynda úlken ózgerister bolady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Prezıdenti Ákimshiligi quqyq qorǵaý júıesi bóliminiń meńgerýshisi Alık Shpekbaev málim etti.
Onyń aıtýynsha, bul ózgerister zańdylyqty nyǵaıtý jolynda eldiń budan ary qaraı damýy úshin mańyzdy bolyp otyr. «Máselen, jańa Qylmystyq-protsessýaldyq kodeksti qabyldaý, azamattyń quqyn tıimdi qorǵaýǵa múmkindik beretin qylmystyq sot isiniń qazirgi zamanǵy standarttaryn Qazaqstanda engizýge yqpal jasaıdy», - dep toqtaldy A. Shpekbaev. Sonymen qatar ol qylmystyq úderistiń sotqa deıingi kezeńinde azamattardyń konstıtýtsııalyq quqy men bostandyǵyn shekteıtin protsessýaldyq májbúrleý sharalary sottyq qadaǵalaýǵa qoıylatynyn atap ótti.
