Qazaqstannyń Qylmystyq kodeksi qaıta jazylýy múmkin
ALMATY. 3 maýsym. QazAqparat /Erbol Azanbek/ - Qylmystyq úderisterdi reformalaý máselesiniń qorytyndysy boıynsha elimizde jańa Qylmystyq kodeks jazylýy múmkin nemese onyń basym bóligi qaıta jazylady.
Bul týraly búgin Almatyda Qylmystyq is júrgizýdi odan ári reformalaý máseleleri jónindegi QR keıbir zańnamalyq aktilerine ózgerister men tolyqtyrýlar engizý týraly» zańnyń jobasyn talqylaýǵa arnalǵan «dóńgelek ústel» barysynda QR Prezıdenti ákimshiligi jetekshisiniń orynbasary Talǵat Donaqov aıtty.
Onyń sózine qaraǵanda sotqa deıingi qylmystyq óndiristi reformalaý ıdeıasy ǵylymı-sarapshylyq talqylaýynan ótip, túrli deńgeıdegi memlekettik qurylymdardyń qaraýyna jetken. «Bul qazirgi Qylmystyq óndiris júıesin reformalaýǵa baılanysty qujattardy daıyndaý jumysynyń bastalǵandyǵyn bildiredi. Bul aýqymdy, josparly, kúrdeli jumys, tek bir ǵana zań boıynsha ondaǵan ózgeris kerek»,- dedi ol.
T.Donaqovtyń aıtýynsha eger jańa Qylmystyq kodeks qabyldanyp nemese ózgertilse prokýrorlar men sottardyń, memlekettik tekserý apparatynyń róli ózgeredi. «Bizge qazir bul reformaǵa qanshalyqty daıyndyǵymyzdy túsiný kerek. Óıtkeni tek qana zańdy ǵana emes, mamandardy daıyndaý kerek. Qylmysty ashý men qylmystyq úderisterdi baqylaýshy mamandardyń kópshiligi keńestik júıeden qalǵan, sot óndirisi úrdisteri de ótken tájirıbelerge súıenip jasalady»,- dedi ol.
T.Donaqov bul jumystardyń bir kúndik emestigin, kezeń-kezeńimen qabyldaý, sondaı-aq óreskel qatelerdiń bolmaýy, jańa júıege asa qıyndyqsyz kóshýi úshin birneshe jylǵa sozylýy múmkindigin atap ótti.
