Qazaqstannyń qylmystyq - atqarý júıesin izgilendirýge baǵyttalǵan rezervter áli sarqylǵan joq - Prezıdent Ákimshiliginiń ókili
ANA. 10 jeltoqsan. QazAqparat /Aıdar Ospanalıev/ - Qazaqstannyń qylmystyq - atqarý júıesin izgilendirýge baǵyttalǵan rezervteri áli sarqylǵan joq. Memleket basshysynyń elimizdiń quqyq qorǵaý organdary men sot júıesiniń qyzmetin jetildirýge qatysty Jarlyǵynan osyndaı oı túıýge bolady.
Bul týraly búgin Astanada ótip jatqan «Quqyq qorǵaý organdaryn reformalaý kezinde qylmystyq - atqarý júıesiniń qyzmetin jetildirý» atty dóńgelek ústel otyrysynda Prezıdent Ákimshiliginiń Quqyq qorǵaý júıesi bóliminiń meńgerýshisi Alık Shpekbaev málim etti.
Onyń sózine qaraǵanda, qylmystyq- atqarý júıesin izgilendirýdi Memleket basshysy aldyǵa qoıyp otyrǵan mindetter negizinde júrgizýdiń tıimdiligin halyqaralyq tájirıbe de kórsetip otyr. «Esterińizge sala keteıin, Shyǵys Eýropa men Baltyq jaǵalaýy elderiniń polıtsııa qyzmetin reformalaý jumystary qylmystyq atqarý júıesindegi reformalarmen qatar júrdi. Osyndaı sátti tájirıbeni Grýzııa da júrgizdi. Al Reseıde mılıtsııa qyzmetin reformalaýmen qatar qylmystyq atqarý júıesin damytý tujyrymdamasy daıyndaldy. Búginde elimizdegi azamattardyń quqyq máselelerin meńgerý deńgeıleri men qazirgi zamanǵy quqyqtyq saıasat qylmystyq jazany ákimshilik jazamen almastyrýǵa jáne quqyq buzǵan azamattardy múmkindiginshe qoǵamnan oqshaýlaýdan azat etetin sharalarǵa almastyrýǵa múmkindik beredi», - dedi A.Shpekbaev.
