Qazaqstannyń qylmystyq atqarý júıesin ІІM-ge ótkizý úderisi aıaqtaldy - ІІM
ASTANA. 14 qyrkúıek. QazAqparat /Jasulan Amanbaıuly/ - Qazaqstannyń qylmystyq atqarý júıesin Ádilet mınıstrliginiń quzyrynan Іshki ister mınıstrligine ótkizý jumystary aıaqtaldy.
Bul týraly búgin Astanada QR Іshki ister mınıstrliginiń resmı ókili Nurdildá Oraz málim etti.
«Qazaqstannyń qylmystyq atqarý júıesin Ádilet mınıstrliginiń quzyrynan Іshki ister mınıstrligine ótkizý úderisi aıaqtalyp qaldy dese de bolady, qazirgi ýaqytta tehnıkalardy berý syndy jumystar júrýde», - deıdi N. Oraz.
Eske sala keteıik, qylmystyq atqarý júıesi Ádilet mınıstrliginiń qaraýyna 2002 jyly ótken bolatyn.
«Alaıda Ádilet mınıstrliginiń quramynda bolǵan kezde qylmystyq atqarý júıesindegi ahýal túzelgen joq, kerisinshe nasharlap ketti. Sottalýshylardyń óz-ózderine qol jumsaý oqıǵalary, bılikke baǵynbaýshylyq faktileri kúnnen kúnge kóbeıe berdi. Ahýaldyń ýshyqqany sonsha, sońǵy eki jylda birneshe ret túrmeden qarýly qashý oqıǵalary oryn aldy. Bul keleńsizdikter Ádilet mınıstrligi qylmystyq atqarý júıesin óz quzyryna alǵaly beri túzetý mekemelerindegi krımınogendik ahýalǵa shamasy kelmegendigin kórsetedi», - dep atap ótti resmı ókil.
Onyń aıtýynsha, endi budan bylaı Іshki ister mınıstrligi tarapynan adamdardyń quqyqtary men bostandyqtaryn, sonyń ishinde sottalýshylardyń quqyqtaryn qorǵaý úshin birtalaı is-sharalar asyrylady. «Biz eń aldymen halyqtyń senimine jumys jasaımyz. Polıtsııa - on jyl burynǵy polıtsııa emes, sondyqtan eń basty maqsatymyz - sottalýshylardyń quqyqtaryn, bostandyqtaryn qorǵaýǵa baǵyttalady. Sonymen qatar qosa ketetinim, biz sottalýshylardy qadaǵalaıtyn qyzmetkerlerdiń ústinen Ózindik qaýipsizdik basqarmasy jumys isteıdi», - dedi N. Oraz.
Atalmysh basqarma qylmystyq atqarý júıesine emes, tikeleı ІІM-niń Ózindik qaýipsizdik departamentiniń quzyrynda bolady. «Eger sottalýshylardyń quqyqtary taptalǵan faktiler anyqtalsa, biz olarmen qatań kúresetin bolamyz», - dep túıdi sózin resmı ókil.
