Qazaqstannyń qus sharýashylyǵy qus tumaýynan qorǵalmaǵan
ASTANA. QazAqparat - Qazaqstannyń qus sharýashylyǵy qus tumaýynan qorǵalmaǵan. Bul týraly búgin Qazaqstan qus ósirýshileri odaǵynyń jyl saıynǵy esepti kezdesýinde odaq prezıdenti Rýslan Sháripov málim etti, dep habarlaıdy QazAqparat.
«Bizge veterınarııa máselesi boıynsha birqatar problemany sheshý qajet. Sońǵy ýaqytta qus tumaýy taralýymen qatysty máseleniń ótkir turǵandyǵy eshkimge de qupııa emes. Eýropanyń birqatar elinde qus tumaýynyń taralýy oryn aldy. Máselen, Polshada 8 deregi tirkelgen. Reseıdiń Rostov oblysynyń jáne Krasnodar ólkesiniń birqatar aýmaǵynda, sonymen qatar ózge de aımaqtarynda juqtyrý oshaqtary tirkelgen bolatyn. Buǵan deıin Astrahan oblysy men Qalmaq Respýblıkasynda shekteý engizilgen edi. Osyǵan oraı memleket esebinen qustardy tolyqtaı vaktsınatsııalaý júrgizýdi usynamyz. Bul «Veterınarııa týraly» zańda kózdelgen», - dedi Sháripov.
Onyń aıtýynsha, búgingi tańda elimizdiń qus sharýashylyqtary vaktsınamen qamtamasyz etilmegen. Tipti óndiristik jaǵdaıda jumys isteıtin iri sharýashylyqtardyń ózinde tegin dıagnostıkalyq tekserý júrgizilmeıdi.
«Al Veterınarııa komıtetiniń aýyl sharýashylyǵy kooperatıvterindegi veterınarııa máselelerin qalaı sheshetindigi áli kúnge deıin aıqyn emes. Biz sońǵy eki aıda Aýyl sharýashylyǵy mınıstrligine Epızotııaǵa qarsy is-sharalar josparyna qus tumaýyna qarsy vaktsınatsııany qosý jáne barlyq aýrý túrlerine dıagnostıka júrgizýge qatysty 10-nan astam hat joldadyq. Alaıda, áli kúnge jaýap kelmedi», - dedi odaq prezıdenti.
