Qazaqstannyń qus ósirýshiler odaǵy jumyrtqa baǵasyna qatysty túsiniktime taratty
ASTANA. QazAqparat - Sońǵy ýaqyttary Qazaqstannyń qus ósirýshiler odaǵynyń atyna jumyrtqa baǵasynyń qymbattaýyna baılanysty suraqtar kóptep túsýde. Osyǵan oraı, Qus ósirýshiler odaǵy baǵa saıasatyna jumyrtqanyń maýsymdyq ónimdiligi áser etip otyrǵanyn alǵa tartady. Bul týraly odaqtyń baspasóz qyzmetinen habarlandy.
Qus ósirýshiler bul rette jazǵy maýsymdarda qus fabrıkalarynyń ónimine baǵanyń 6-8 teńgeden aspaıtynyn alǵa tartady. Al kúzgi-qysqy merzim aralyǵynda ótkizý baǵasy 17-20 teńgeni quraıdy. Salystyrmaly túrde alǵanda aǵymdaǵy kezeń boıynsha 2014 jyldyń ótkizý baǵasy 15-16 teńgeni quraǵan. Budan bólek, taratylǵan málimetterge qaraǵanda búgingi tańda 1 jumyrtqanyń ózindik baǵasy - 13 teńgeden asady. Al ónimniń ózindik quny eń birinshi kezekte 40 paıyzyna deıin áser etetin jem baǵasyna táýeldi. Aıta keterligi, sońǵy eki aı ishinde elimizde jem baǵasy eki esege deıin kóterilgen.
«Eger qazan aıynda kúnbaǵys shrotyn kelisine 42 teńgeden alsaq, qarasha aıynda 78 teńge boldy. Al soıa shroty kelisine 93 teńgeden 138 teńgege kóterildi. Basqa aýyl sharýashylyǵy daqyldarymen qatar jemniń negizi bolyp tabylatyn qurama jem jumyrtqanyń ózindik qunyna 50 paıyzǵa áser etedi. Bunyń ózi sońǵy ýaqytta aıtarlyqtaı qymbattady, eger 4 surypty bıdaıdy biz 26 myń teńgege alyp kelsek, qazir 36 myń teńgege artty», - dep túsindiredi baǵaǵa qatysty saýaldarǵa «Úsh Bulaq 2005» JShS dırektory Dıas Isanov.
Bul rette qus ósirýshiler monopolııaǵa qarsy komıtet tarapynan baǵanyń qatań baqylaý jaǵdaıynda ómir súryp jatqanyn, sál ǵana kóterýdiń ózi úlken aıyppulǵa soqtyratynyn alǵa tartady. Sonymen qatar, qazir elimizdegi barlyq qus fabrıkalaryna tergeýler júrgizilip jatqan kórinedi. Al keıbir qus sharýashylyqtaryna 30 mln. teńgeden astam aıyppul sanktsııalary salynǵan.
«Qus fabrıkalary jumyrtqany ár danasyn 18 teńgeden shyǵarady, al sýpermarketterde biz on danasynyń 350-400 teńgege satylyp jatqanyn kórip otyrmyz. Sonda Tabıǵı monopolııalardy retteý jáne básekelestikti qorǵaý komıteti tek qus sharýashylyǵy sýbektilerin qadaǵalap, salanyń damýyna esh múmkindik bermeı otyrǵan joq pa? Sonymen qatar, bólshek saýdada azyq-túlik baǵasyn óndirýshi ǵana emes, satýshylar da qalyptastyratyny belgili ǵoı. Bul jerde, baǵa saıasatyn saýda jelileri aıqyndap otyr. Sondyqtan da, jumyrtqa baǵasyna qatysty suraqtardyń barlyǵyn sol jaqqa joldasaq eken, múmkin olar jumyrtqa baǵasyna maýsymdyq qubylystarǵa qatysty jaǵdaıdy túsindirer», - deıdi Qazaqstan Qus ósirýshiler odaǵynyń prezıdenti Rýslan Sharıpov.
