Qazaqstannyń qurylys qarqyny azaıǵan óńirleri ataldy

ASTANA. QazAqparat - QR Ulttyq ekonomıka mınıstri Tımýr Súleımenov Úkimet otyrysynda eldiń 2018 jyldyń І toqsanyndaǵy áleýmettik-ekonomıkalyq kórsetkishteriniń qorytyndysy týraly aıtyp berdi, dep habarlaıdy QazAqparat tilshisi.

«Óńirlik bóliniste ekonomıka salalarynda birdeı emes qarqyn baıqalady. Ónerkásipte 3 óńirlerden basqa, barlyq óńirler ósýdi kórsetip otyr. Respýblıkalyq mánnen tómen ósim 7 óńirde baıqaldy. Aýyl sharýashylyǵynda barlyq óńirler ósimge qol jetkizgenimen, respýblıkalyq kórsetkishten tómen qarqyn 7 oblysta tirkeldi», - deıdi mınıstr.

Tımýr Súleımenovtyń aıtýynsha, qurylys boıynsha tómendeý Astana qalasynda, Pavlodar, Atyraý, Batys Qazaqstan oblystarynda baıqalǵan.

«Bul turǵyn úı qurylysy jáne ónerkásiptik nysandar, magıstraldyq gaz jáne qubyrlar qurylysy boıynsha jumystardyń tómendeýine baılanysty. Turǵyn úılerdi paıdalanýǵa berý 8,1% tómendedi. Eń kóp qysqarý Almaty qalasynda, Qyzylorda oblysynda jáne Astana qalasynda baıqaldy. Basqa óńirlerde turǵyn úı qurylysy ósim jaǵynan 2,7 paıyzdan 51,9 paıyzǵa deıingi qarqyndy kórsetti», - dedi Tımýr Súleımenov.