Qazaqstannyń qurmetti jýrnalısiniń jańa jınaǵy jaryq kórdi
ASTANA. QazAqparat - Jýrnalıstıka - qıyndyǵy men qyzyǵy mol, úlken jaýapkershilikti talap etetin mamandyq. Sebebi, BAQ halyq pen bılik arasyndaǵy altyn kópir ispettes.
2011 jyldan beri elimizde 28 maýsym - Baılanys jáne aqparat qyzmetkerleri kúni kásibı merekesi jyl saıyn dástúrli túrde atap ótiledi.
Osy oraıda, jaqynda Máskeýdiń «Álem halyqtarynyń tilderi» baspasynan qazaqstandyq belgili qalamger, Qazaqstannyń qurmetti jýrnalısi Serikqalı Baımensheniń «Syrdeste» dep atalatyn jańa jınaǵy jaryq kórdi.
Avtor bul eńbeginde taǵylymdy tarıh, urpaq jalǵastyǵy, qanattas qalamgerler haqyndaǵy ónegeli derekterdi oı tarazysynan ótkizip, qas-qaǵym tirshiliktiń syralǵy sýretterin sóıletedi; tilge, ádebıetke, baspasóz shejiresine qatysty ǵylymı pikirlerin ortaǵa salady.
Derekti áńgime jáne kórkem esse úlgisinde jazylǵan «Ustazǵa hat», «Dos dıdary», «Jaqsylyq joly», «Tórt támsil», «Jazý tili», «Tildiń gúli», «Saqnama» jáne t.b. eńbekteri oqyrmandy beıtarap qaldyrmaıtyny sózsiz.
Serikqalı Baımenshe - qazaqstandyq belgili qalamger, ǵalym-dıplomat, fılologııa ǵylymdarynyń doktory, Qazaqstannyń qurmetti jýrnalısi, Qazaqstan Jýrnalıstıka akademııasynyń akademıgi jəne jalpyulttyq «Altyn juldyz» dıplomynyń ıegeri, Reseı Aýdarmashylar odaǵynyń múshesi.
Baılanys jáne aqparat qyzmetkerleri kúniniń tarıhyna toqtalar bolsaq, elimiz táýelsizdikke qol jetkizgen kezden beri Qazaqstannyń jýrnalıstıkasy kúni 10 mamyrda atap ótilip keldi. Sebebi, 1870 jyly dál osy kúni qazaq tilindegi alǵashqy basylym - «Túrkistan ýálaıaty gazetiniń» alǵashqy sany jaryq kórdi.
1997 jyldan bastap jýrnalısterdiń kásibı merekesi BAQ týraly qazaqstandyq alǵashqy zań («Baspa jáne ózge de buqaralyq aqparat quraldary týraly» QazKSR-i Zańy) qabyldanǵan kúndi (28 maýsym) negizge ala otyryp, tilshiler merekesi maýsymnyń sońǵy jeksenbisinde atap ótilip keldi.
2011 jyldyń qazanynda Qazaqstan Respýblıkasynyń Prezıdenti Nursultan Nazarbaev elimizdegi kásibı jáne basqa da merekeler tiziminiń jańa redaktsııasyn bekitti. Osy qujatqa sáıkes, 28 maýsym - Baılanys jáne aqparat quraldary qyzmetkerleri kúni bolyp bekitildi.
