Qazaqstannyń qurmetti konsýldaryna jańa mindetter júkteldi
ASTANA. QazAqparat - QR Syrtqy ister vıtse-mınıstri Muxtar Tileýberdiniń aıtýynsha, endigi kezekte Qazaqstannyń qurmetti konsýldary shetelde júrgen azamattardyń quqyqtaryn qorǵap qana qoımaı, ınvestıtsııalardy tartý jumysymen de aınalysady, dep xabarlaıdy QazAqparat tilshisi.
«Búgingi sharanyń negizgi maqsaty - Qazaqstannyń qurmetti konsýldarynyń ekonomıkalyq rólin kúsheıtý. Negizi, shetelde júrgen Qazaqstan azamattarynyń quqyqtaryn qorǵap, elshilikterdiń jumysyna qolǵabys jasaý - qurmetti konsýldarynyń basty mindeti bolyp sanalady. Endigi kezekte ekonomıkalyq dıplomatııaǵa basymdyq beriledi. Sebebi Memleket basshysy Nursultan Nazarbaev syrtqy ister mınıstrligine ınvestıtsııalardy tartý jáne qazaqstandyq eksporty damytý mindetterin júktep otyr. Bizdińshe, qurmetti konsýldar osy jumysqa belsene atsalysa alady», - dedi Tileýberdi búgin qurmetti konsýldar sezinde.
Búgingi shara barysynda QR Investıtsııalar jáne damý mınıstrligi, «Qazaq ınvest» ulttyq kompanııasy, «Báıterek» xoldıngi jáne «Atameken» kásipkerler odaǵy sheteldik ınvestorlar úshin Qazaqstanda jasalyp jatqan jaǵdaılar jaıynda keńinen áńgimelep berdi.
Aıta keteıik, sezd kezinde QR Investıtsııalar jáne damý vıtse-mınıstri Erlan Qaıyrov Qazaqstandaǵy shetel ınvestıtsııalarynyń artyp jatqanyn jetkizdi . Budan bólek, Turǵyn-úı qurylys jınaq bankin jekeshelendirý jumysy jalǵasýda.
Qazaqstannyń shet memleketterdegi qurmetti konsýldarynyń sezi barysynda birqatar dıplomattar marapattaldy. Olardyń ishinde Qazaqstannyń Sırııadaǵy qurmetti konsýly Saıd Naxas myrzaǵa erekshe alǵys aıtyldy. Sebebi ol áskerı qaqtyǵystar kezinde Qazaqstan azamattarynyń elge qaıtýyna kómektesti.
