Qazaqstannyń Qurlyq áskerlerinde tehnıkanyń qysqa daıyndyǵy aıaqtaldy

NUR-SULTAN. QazAqparat - Qurlyq áskerleriniń mamandary on myńnan astam qarý-jaraq pen áskerı tehnıkany tekserip, olardy tómengi temperatýrada jumys isteýge daıyndady. Bir aı ishinde tehnıka qysqa daıyndaldy, dep habarlaıdy QazAqparat QR QM baspasóz qyzmetine silteme jasap.

Qurlyq áskerleri bas qolbasshysynyń basqarmasy jáne Qarýly Kúshterdiń Tyl jáne qarý-jaraq basqarmasynyń komıssııalary atqarylǵan jumystardyń sapasyn tekserýi qarý-jaraq pen áskerı tehnıkanyń qysta paıdalaný rejımine daıyndaýdyń sońǵy kezeńi boldy.

Árbir qurama men áskerı bólim 12 upaılyq júıemen baǵalandy. Barlyq júıelerdiń, toraptardyń jáne agregattardyń jumys qabileti tekserildi. Qyzmet kórsetýdiń tolyqtyǵy men sapasyna, janarmaı júıesin tazalaýǵa, qarý-jaraq pen áskerı tehnıkanyń janarmaı júıesiniń súzgish elementterin aýystyrýǵa erekshe nazar aýdaryldy.

– Qarý-jaraq pen tehnıkanyń túrine qaraı Qurlyq áskerleriniń quramalary men áskerı bólimderiniń áskerı qyzmetshileri ár shtattyq birliktegi 50-deı tehnıkany qarap-tekserdi. Bul bólimshelerdiń joǵary jaýyngerlik ázirligin qoldaýǵa baǵyttalǵan aýqymdy júıeli jumys, – dedi Qurlyq áskerleri bas qolbasshysynyń materıaldyq-tehnıkalyq qamtamasyz etý jónindegi orynbasary general-maıor Aleksandr Ashırov.

Tekserý qorytyndysy boıynsha óńirlik qolbasshylyqtar men tikeleı baǵynysty bólimderdegi qarý-jaraq pen áskerı tehnıkany kútip-ustaýǵa jáne olardy qysqy jaǵdaılarda paıdalanýǵa qoıylatyn talaptardy úzdik oryndaǵan bólimsheler aıqyndaldy.