Qazaqstannyń qurama komandasy tuńǵysh ret djıý-djıtsýdan ótken úshinshi álem chempıonatynda birinshi komandalyq oryndy jeńip aldy

Bul týraly búgin Almatyda ótken baspasóz máslıhatynda komandanyń bas bapkeri, Kásibı jekpe-jek sporttyq djıý-djıtsý Profı faıt ulttyq federatsııasynyń vıtse-prezıdenti Qanat Tileýimbetov málim etti.

"Bul Qazaqstandy álemdik sport sahnasynda laıyqty tanyta bilgen bizdiń sportshylarymyzdyń úlken jetistigi", - dep atap ótti ol baspasóz máslıhatynda.

"Kıevtegi Sport saraıynda ótken sport dodasyna Eýropa, Azııa, Afrıka elderiniń jetekshi qurama komandalary baq synasty. Jekpe-jek eki bólimnen turdy: erler men áıelder arasyndaǵy tolyq qatynasty jekpe-jek, erler, áıelder men ardagerler arasyndaǵy ózindik qorǵanys. Bul jarys djıý-djıtsý saıys óneriniń bedelin nyǵaıtý, sportshylardyń, bapkerler men tóreshilerdiń sheberligin shyńdaý,  sondaı-aq memleketter arasyndaǵy dostyq qarym-qatynasty kúsheıtý maqsatynda ótkizildi", -dedi  Q. Tileýimbetov.

Onyń aıtýynsha, Federatsııaǵa Dáýren Musanyń prezıdent bolyp kelýimen jumystar ilgerilegen. "Dáýren Musa qurǵan "Bes qarý" federatsııasy (www.beskaru.kz) 2008 jyly Qazaqstannyń ulttyq sport túrleri boıynsha úzdik federatsııa bolyp tanyldy. 2009 jyly "Bes qarý" federatsııasy jekpe-jek óner túrlerin damytýǵa qosqan úlesi úshin "Habkıdo" ǵalamdyq federatsııa dıplomymen marapattaldy. Sonymen qatar, byltyrǵy jyldyń sońynda Almatyda Dáýren Musanyń tikeleı basshylyǵymen erkin jekpe-jek boıynsha "Qazaqsha tóbelesten" ekinshi álem chempıonaty ótti. AQSh-tyń Halyqaralyq jekpe-jek óner akademııasy Dáýrenge 2011 jyldyń sporttyq "Oskaryn" tabys etti. Dáýren Musany djıý-djıtsý ulttyq federatsııasynyń prezıdenti etip saılaý qazaqstandyq djıý-djıtsýdyń damýyna, ejelgi sport túriniń jandanýyna jańasha serpin berdi", - deıdi ol. 

Djıý-djıtsý Qazaqsha tóbeles jáne Bes Qarý ıdeıasyna tolyq sáıkes keletin qatań jekpe-jek túri bolyp tabylady.

Djıý-djıtsý Profı faıt ulttyq federatsııasynyń júldeli orynǵa ıe bolǵan sportshylardyń aty-jóni:

Tileýimbetov Erlan, 69 kg, altyn

Raqyshev Baýyrjan, 92 kg, altyn

Kasymov Shyńǵys, +92 kg, altyn

Jaqypova Albına, 56 kg, altyn

Baıtyrbaeva Aqjarqyn, 62 kg, altyn

Ekpik Dıdar +80 kg, altyn

Tileýimbetov Nurlan, 84 kg, kúmis

Jadyrqasynov Qanat, 92 kg, qola

Áshim Qalı, qola (ózdik qorǵanys)