Qazaqstannyń qurama komandasy alǵash ret áskerıler arasyndaǵy bokstan 53-inshi Álem chempıonatynyń kóshpeli Kýbogyn ıelendi
ASTANA. Qazannyń 26-sy. QazAqparat /Arman Asqarov/ - AQSh-ta ótken áskerıler arasyndaǵy bokstan 53-inshi Álem chempıonatynda Qazaqstannyń Qarýly Kúshteri quramasy jalpy esepte birinshi komandalyq orynǵa ıe bolyp,
chempıonattyń kóshpeli Kýbogymen elge oraldy. Osyǵan oraı búgin Astanada arnaıy baspasóz máslıhaty uıymdastyryldy.
QR Qorǵanys mınıstrligi Sport komıtetiniń tóraǵasy Erlan Talasbaevtyń aıtýynsha, atalǵan chempıonatta brinshi komandalyq orynǵa ıe bolý Qazaqstan úshin úlken jetistik. «Sebebi reıtıngke sáıkes Dúnıejúzi áskerı sport uıymy aıasynda ótip otyratyn osy chempıonat álemdegi barlyq áskerıler úshin eń abyroıly ári mańyzdy halyqaralyq sport dodasy bolyp tabylady. Búgingi tańda Dúnıejúzi áskerı sport uıymy óziniń buqaralyq mańyzdylyǵy jaǵynan Olımpıada komıteti men Stýdentterdiń halyqaralyq sport uıymynan keıin úshinshi orynda keledi. Biz alǵash ret osy uıym aıasynda ótken áskerıler arasyndaǵy bokstan 53-shi Álem chempıonatynda I-shi komandalyq orynǵa ıe bolyp, chempıonattyń kóshpeli Kýbogyn elimizge alyp keldik. Osymen biz 2011 jyly Brazılııada ótetin V Búkilálemdik áskerı oıyndarǵa qatysýǵa joldama aldyq», - deıdi E.Talasbaev.
Aıta keteıik, qazannyń 8-17-si kúnderi aralyǵynda AQSh-tyń Ledjýn áskerı bazasynda ótken áskerıler arasyndaǵy bokstan 53-shi Álem chempıonatynda Qazaqstan 2 altyn, 3 kúmis jáne 4 qola medaldardy ıelenip, chempıonattyń kóshpeli Kýbogymen marapattaldy. Qazaqstanǵa altyn medal alyp bergen jeńimpazdardyń ishinde Berik Ábdirahmanov jáne Mereı Aqshalov bar. «Chempıonattyń aqtyq syndarynda men amerıkandyq boksshymen shyǵyp judyryqtastym. Ol óz jerinde ári oǵan qoldaý kórsetken jankúıerler kóp boldy. Biraq buǵan qaramastan, men osy qarsylasymdy 7:1 esebimen oısyrata jeńdim», - deıdi chempıonattyń altyn medal ıegeri, qatardaǵy jaýynger Mereı Aqshalov.
