Qazaqstannyń kúnbaǵys tuqymyna, un men astyǵyna eksporttyq suranys artady
«Dál qazirgi ýaqytta kúnbaǵys tuqymyna, barlyq maıly daqyldarǵa, bıdaıǵa, unǵa jáne odan jasalatyn barlyq ónim túrlerine suranystyń artatyndyǵyna batyl boljam jasaı alamyz. Bizdiń mindetimiz – osy suranysqa daıyn bolý jáne eń aldymen qazaqstandyqtardyń ózindik tutynýyn tolyǵymen qamtamasyz etý úshin úlken kólemde óndirý ári artyq ónimdi shetelge shyǵaryp, eksporttaý», - dedi mınıstr Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, kúnbaǵys maıynyń, dándi daqyldardyń, sonymen qatar unnyń baǵasy qymbattap keledi.
«Osy oraıda baǵa ósimi bizdiń aýyl sharýashylyǵy taýarlaryn óndirýshilerge qolaıly bolmaq. Bıyl biz jaǵdaıdy, qolaıly konıýktýrany jáne Qazaqstanda shyǵarylatyn aýyl sharýashylyǵy taýarlarynyń negizgi tobynyń baǵasy ósimine qatysty boljamdy barynsha tıimdi paıdalanyp qalýymyz qajet. Barlyq alańdy múmkindiginshe ıgerip, mol ónim alýymyz kerek. Barlyq agrotehnologııalar men aýyl sharýashylyǵy taýarlaryn óndirýshilerdi tıimdi paıdalana otyryp, bıyl mol tabys tabýǵa óte jaqsy múmkindik bar», - dedi ol.
Sonymen qatar mınıstr BAQ ókilderiniń saýalyna oraı Germanııadaǵy kúnbaǵys maıynyń kúrt qymbattaýyna qatysty pikir bildirdi.
«Eń aldymen óz naryǵymyzdy molyqtyryp alýǵa tıispiz. Birinshi mindet – mundaı jaǵdaıdyń Qazaqstanda qaıtalanbaýy, elimizde kúnbaǵys maıynyń 2-3 ese qymbattamaýy. Bul rette eger kúnbaǵys tuqymyn óndirýshilerdi shamadan tys qysyp jibersek, onda olar kelesi jyly seppeıdi. Bizdiń mindetimiz – kúnbaǵys maıy men kúnbaǵys tuqymyn óndirýshilerdyń ymyra tabýy jáne baǵanyń Qazaqstannyń ishinde joǵary bolmaýy, sonymen qatar bul baǵanyń zaýyttyń da, kúnbaǵys tuqymyn óndirýshilerdiń de kiristiligin qamtamasyz etýi. Boljamǵa qaraǵanda bıyl kúnbaǵys tuqymy sebiletin alań, sharýashylyqtar artyp keledi. Osy baǵytta jumys istep jatyrmyz», - dedi Erbol Qarashókeev.