Qazaqstannyń kúnbaǵys maıy qymbattaýyna baılanysty keı aýǵan kásipkerleri bizden maı alýdy qoıǵan

ASTANA. QazAqparat - Aýǵanstan qazaqstandyq kúnbaǵys maıynyń qymbat bolýyna baılanysty osy ónimdi satyp alýdy azaıta bastady. Bul týraly Astanadaǵy Qazaqstan-Aýǵanstan iskerlik forýmynda «Bashır Navıd Kompleks» bas dırektory Nýrıddın Zaker Ahmadı aıtty, dep habarlaıdy QazAqparat tilshisi.

«Biz Qazaqstandaǵy bıznes forým men kórmege qatysqanymyzǵa óte qýanyshtymyz. Qazaqstan Úkimeti bizdi qoldaıdy dep senemiz. Qazaqstannan Aýǵanstanǵa astyq pen undy úlken kólemde ımporttap jatyrmyz. Búgingi forým aıasynda ózara tıimdi usynystardy kútemiz», - dedi Nýrıddın Zaker Ahmadı.

Onyń aıtýynsha, Aýǵanstan kásipkerleri buryndary Qazaqstannan kúnbaǵys maıyn ımporttaǵan.

Alaıda qazir bul ónimdi alý tıimsiz bola bastady.

«Qazir kúnbaǵys maıy qymbattap ketti. Sondyqtan biz Reseıden, Ýkraınadan satyp alyp jatyrmyz. Bul elder Qazaqstanǵa qaraǵanda arzanyraq berip jatyr», - dedi aýǵan kásipkeri.

Bul turǵyda ol eki jaqtyń saýda máselesin sheshýge baǵyttalǵan birlesken palata qurýdy usyndy.

Aıta keteıik, Astanadaǵy Qazaqstan-Aýǵanstan iskerlik forýmy aıasynda jalpy somasy 190,8 mln dollardy quraıtyn eksporttyq kelisimsharttarǵa qol qoıyldy.

Qol qoıylǵan qujattardyń birazy maı tasymaldaý boıynsha sharttardy qamtyp tur.