Qazaqstannyń qunarly jerleri bos jatpaýy kerek - J. Úshkempirov
«Biz táýelsiz memleketpiz. Bul ata-babamyzdyń ańsaǵan armany edi. Otandastarymyz bul táýelsizdikke ońaı jolmen jetpegenimizdi túsinýi kerek», - dedi J. Úshkempirov.
Onyń pikirinshe, azamattar aǵa urpaqtyń isin jalǵaı otyryp, aýyl sharýashylyǵy men agroónerkásiptik keshendi damytýǵa atsalysýlary tıis.
«Men ózim aýylda týyp ósken adammyn. Qazir mal ósirýmen aınalysamyn. 2006 jyly 20 myń gektar jerdi 49 jylǵa alyp edim. Búginde osy jerdi damytýǵa bar kúshimdi salyp jatyrmyn. Qolastymda 100-den astam adam jumys isteıdi. Jer, bosqa jatqansha tabys ákelýi tıis. Bizdiń sapaly aýyl sharýashylyǵy ónimderin óndirýge jáne olardy ishki jáne syrtqy naryqqa shyǵarýǵa áleýetimiz jetedi. Bul úshin jańa tehnologııalardy qoldana otyryp, ónimdilikti arttyrýymyz qajet. Sondyqtan, jerdi sheteldikterge jalǵa berýdi durys sheshim dep sanaımyn», - dedi J. Úshkempirov.
Sondaı-aq, sharýa qojalyǵynyń basshysy jerdiń sheteldikterge eshqashanda satylmaıtyndyǵyn basa aıtty.
«Zańda sheteldikterge jer satýǵa tyıym salynǵan. Al, jalǵa berý kóp múmkindikter ashady. Onda jasalǵan barlyq ınfraqurylymdar bolashaqta ózimizge qalady», - dedi ol.
Budan basqa, Jaqsylyq Úshkempirov jerdi jalǵa berýdiń qatań erejesi bar ekendigin, ony oryndamaǵan jaǵdaıda jer merziminen buryn memleketke qaıtarylyp alynatyndyǵyn eskertti.
«Qazaq jeri sheteldikterge eshqashan da satylmaıdy. Tek bizge tıimdi bolatyndaı shartpen jalǵa beriledi. Sondyqtan, biz mynadaı qıyn kezeńde bir jaǵadan bas, bir jeńnen qol shyǵara otyryp, eldiń damýyna eńbek etýimiz qajet», - dep sózin aıaqtady J. Úshkempirov.
