Qazaqstannyń kýbık qurastyrýshylary Azııa chempıonatynda 1-oryn aldy
NUR-SULTAN. QazAqparat – Elordada Rýbık kýbıgin qurastyrý boıynsha Azııa chempıonaty aıaqtaldy. Onda Qazaqstan medaldik esepte kósh bastady, dep habarlaıdy QazAqparat tilshisi.
Atalǵan sport túrinen Azııa chempıonaty 2 jylda bir ótedi. Jarysty ótkizetin el baıqaý arqyly anyqtalady. Bıyl spıdkýbıngiden Azııa chempıonatyn ótkizý qurmeti Ortalyq Azııa elderi arasynda alǵash Qazaqstanǵa berildi.
Bıylǵy chempıonatqa 13 elden 18-20 jas aralyǵyndaǵy 116 sportshy qatysqan.
«Sońǵy 4 kúnde elordamyzǵa álemniń 13 elinen túrli ult, túrli tilde sóıleıtin, túrli jastaǵy adamdar jınaldy. Osy shara úshin myńdaǵan shaqyrym júrip kelgen qatysýshylar bar. Bul da kýbıngide esh shekara bolmaıtynyn kórsetse kerek. Qazirgi ýaqytta álemdik spıdkýbıng federatsııasy kýbıngini sport retinde tanýǵa ótinim berdi. Qazaqstan da 5 jylda óte kóp eńbektendi, onyń jemisi – búgingi Azııa chempıonatyn ótkizý. Endi 2025 jylǵy Spıdkýbıngiden álem chempıonatyn ótkizýge ótinim beremiz», - dedi Qazaqstan spıdkýbıng federatsııasynyń prezıdenti Arman Máshimov jeńimpazdardy marapattaý rásiminde.
Sonymen birge, jeńimpazdardy QR Mádenıet jáne sport mınıstri Dáýren Abaev, Parlament Májilisiniń depýtaty Elnur Beısembaev, «Amanat» partııasynyń hatshysy Dáýlet Káribek marapattady.
«Spıdkýbıng baıqaýyna bizdiń elimiz 2017 jyly birinshi ret qatysa bastady. Qazir osy 5-6 jylda úlken jetistikterge jetip jatyrmyz. Bizdiń oıymyzsha, jastar jaman ádetterden góri osyndaı oıyndarmen kóptep aınalyssa, oılaý qabiletin damytsa, jalpy elimizge paıdasyn tıgizedi dep oılaımyn. Osyndaı chempıonattar bizdiń odan ári qatysatyn balalardyń sanyn kóbeıtedi degen senimdemin. Qazir elimizde 10 myńnan astam kýbık qurastyrýshy bar, bul kórsetkishti maqtan tutýǵa bolady. Bizdiń osynda kelýimizdiń sebebi de – spıdkýbıngige qoldaý kórsetý. Bizdiń mınıstrlikke qarasty «Kazakh Tourism» kompanııasy osy chempıonatty uıymdastyrýǵa kómektesti. Endi 2025 jylǵy álem Chempıonatyn ótkizýge ótinim beremiz, Azııa chempıonatyna júzden astam adam qatyssa, álemdik dodaǵa myńnan astam qatysýshy keledi», - dedi Mádenıet jáne sport mınıstri Dáýren Abaev.
Jalpy esepte Qazaqstan 5 altyn, 6 kúmis, 2 qola medalmen top jardy. Ekinshi orynǵa Úndistan (4 altyn, 5 kúmis, 8 qola), úshinshi orynǵa Qytaı (4 altyn, 4 kúmis, 2 qola), Japonııa 4 altyn, 5 qola júldemen tórtinshi orynǵa turaqtady.
Qazaqstandyq sportshylar arasynda Shyńǵys Sultanbekov, Erkin Asylbek, Aral Asqarov, Danıal Súleımen, Dýman Talǵatuly jeńis tuǵyrynan kórindi.
Mońǵolııa men Qyrǵyzstan kýbıkshileri bir-bir kúmis qolany mise tutty, al Ózbekstan men Pákistan sportshylaryna júlde buıyrmady.
Odan bólek, Azııa eli bolyp sanalmaıtyn Reseı, Ázerbaıjan, Belarýs, Frantsııa, Nıderlandy sportshylary esepten tys, tájirıbe retinde chempıonatqa qatysqan.
Jeńimpazdarǵa Báıterek pishininde jasalǵan músinsheler syıǵa tartyldy, al Báıterektiń ishinde Azııa memleketteriniń týlary beınelengen Rýbık kýbıgi ornatylǵan. Sondaı-aq, júldegerlerge «Rubik’s WCA Asian Championship 2022» medaldary men aqshalaı júlde berildi. Jalpy júlde qory 9 myń AQSh dollaryn quraǵan.
Aıta keteıik, qazirgi ýaqytta elimizde 10 myńnan astam kýbık qurastyrýshy bar, kásibı kýberler sany myńnan asty. Salystyrmaly túrde 2017 jyly bul sport túrinde elimizde tek 16 adam ǵana bolǵan.
