Qazaqstannyń qoı etine shet elderdiń qyzyǵýshylyǵy joǵary – Saparhan Omarov
«Qazirgi tańda Qazaqstannyń ishki naryǵy otandyq qoı etimen 100 paıyzǵa qamtamasyz etilgenin atap ótkim keledi. Sonymen birge, otandyq qoı etine shet elderdiń qyzyǵýshylyǵy zor ekeni belgili. Mysaly, boljam boıynsha 2026 jyly Qytaı Halyq Respýblıkasy 232 myń tonna, Eýrazııa odaǵy elderi 172 myń tonna, Birikken Arab Ámirligi 228 myń tonna, Malaızııa 46 myń tonna qoı etin qajet etedi. Al bul bizdiń respýblıkamyzdyń keń baıtaq jaıylymda qoı ósirýdi damytýǵa zor múmkindik beretini anyq. Bolashaqta respýblıkanyń qoı sharýashylyǵy jahandyq naryqta tek joǵary sapaly ónimmen, jańa tehnologııalardy paıdalanýmen básekelese alady», - dedi mınıstr.
Sonymen qatar ol bıyl Qazaqstan Respýblıkasynyń agroónerkásiptik keshenin damytýdyń memlekettik baǵdarlamasy aıaqtalatyndyǵyn atap ótti.
«Memleket basshysy Úkimetke bıznespen birlesip, agroónerkásiptik keshenin damytýdyń aldaǵy 5 jylǵa arnalǵan sapaly jańa Ulttyq jobasyn ázirleýdi tapsyrdy. Osy jyldyń 21 sáýirinde ótken Reformalar jónindegi joǵarǵy keńestiń kezekti otyrysynda Memleket basshysy Ulttyq joba boıynsha jalpy tásildemelerdi maquldandy. Agroónerkásiptik keshenin damytýǵa baǵyttalǵan Ulttyq jobada qoı sharýashylyǵymen aınalysatyn fermerlerdi úzdik dúnıejúzilik tájirıbeler men tehnologııalardy qoldanýǵa yntalandyrý, jaıylymdardy ıgerýde jańa tehnıka men tehnologııalardy alýǵa jeńildetilgen kredıtter berý, fermerlerdi jaıylymmen qamtamasyz etý, halyqaralyq qarjy ınstıtýttarynan qarajat tartý, shopandardyń zeınetke shyǵý jasyn tómendetý, balalaryna memlekettik-jekeshelik áriptestiktik negizinde mektep-ınternattar qurý sııaqty is-sharalar qarastyrylǵan. Alda birlesip atqaratyn jumystar kóp», - dedi Saparhan Omarov.
