Qazaqstannyń qoı eti Qytaı naryǵyna shyǵýy múmkin

ASTANA. QazAqparat - QR Aýyl sharýashylyǵy mınıstrliginde Qytaıdyń Sapa, tekseris jáne karantındi baqylaý boıynsha bas basqarmasy (AQSIQ) men Sertıfıkattaý men tirkeý jónindegi bas basqarmasynyń ókilderimen kezdesý ótti.

Onda Qazaqstannyń veterınarlyq júıesin baǵalaý, Qytaıǵa shyǵarylýy múmkin qoı eti ónimderine qoıylǵan veterınarlyq-sanıtarlyq talaptar jaıy sóz boldy, dep habarlaıdy QazAqparat. 

Aýyl sharýashylyǵy mınıstrliginiń baspasóz qyzmetinen habarlanǵanyndaı, sáýirdiń 19-27 aralyǵynda, Qytaı delegatsııasy «Atameken» Ulttyq kásipkerlik palatasy men Sarapshylar qaýymdastyǵy usynǵan qoı etin óndiretin birqatar kásiporyndardy aralap, olarǵa tekserý júrgizedi. Bul rette Qytaı mamandary tartylǵan arnaıy ınspektsııa qazaqstandyq áriptesterimen birlesip elimizdiń 5 óńirindegi iri et óndirýshi kásiporyndardyń jumysymen tanysýdy josparlap otyr.

«Aıta keterligi qazirgi tańda Qytaıdyń Sertıfıkattaý men tirkeý jónindegi bas basqarmasyna álem boıynsha 100-den asa memleket 10 myńǵa tarta usynys tastaǵan. Olar Qytaıdan oń qorytyndy alý kezegin kútýde. Alaıda, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetovtyń aǵymdaǵy jylǵy sáýir aıynyń basynda Qytaı Halyq Respýblıkasyna is-sapary aıasynda jasalǵan kelissózderdiń arqasynda, Qazaqstannan túsken usynystarǵa aıryqsha mán berilip, merzimi jedeldetildi», - delingen baspasóz baıanynda.

Tekserý nátıjesiniń qorytyndysy boıynsha, qazaqstandyq qoı etin qytaı naryǵyna shyǵarýǵa ruqsat berý máselesi qaralady.