Qazaqstannyń kórnekti sportshylarynyń 90%-y aýyldan shyqqan - E.Qanaǵatov

ASTANA. QazAqparat - Qazaqstannyń kórnekti sportshylarynyń 80-90%-y aýyldan shyqqan. Bul týraly búgin Ortalyq Azııanyń Eýrazııa Qory men Mádenıet jáne sport mınıstrligi, Bilim jáne ǵylym mınıstrligi jáne «Bolashaq» qaýymdastyǵy arasyndaǵy yntymaqtastyq týraly kelisimge qol qoıý rásiminde QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov málim etti.

«3.2.1 - Start!» jobasy aıasynda jasalǵan atalǵan memorandým aýyl mektepterinde dene shynyqtyrý jáne sport jaǵdaıyn júıeli jaqsartýǵa baǵyttalyp otyr.

«Qazaqstannyń kórnekti sportshylarynyń 80-90%-y aýyldan shyqqan. Sondyqtan biz aýyl sportyna úlken mán berý kerekpiz jáne atalmysh shara osyǵan septigin tıgizedi. Biz Eýrazııa qory men Coca-Cola demeýshiligine alǵys bildiremiz. Bizben osy baǵytta áriptestik júrgizetin osyndaı uıymdardyń kóp bolǵanyn qalar edik», - dep atap ótti E.Qanaǵatov.

2015 jyldan bastap «3.2.1 - Start» pılottyq joba Aqmola oblysynyń Arshaly aýdanynda júzege asyrylyp keledi. Osylaısha, 18 mektep jańa sporttyq jabdyqtarmen qamtamasyz etildi. Barlyǵy 49 túrli sporttyq jabdyqtar jáne 1700 dana qural satyp alyndy. Keıbir sporttyq zaldar jóndeýden ótkizildi. Ijev mektebinde qyzdarǵa bı, gımnastıka, ıoga úshin horeografııalyq zaldar salyndy. Nıkolaevka aýylynda ashyq hokkeı alańy salyndy. 33 ustaz oqytýdyń jańa ádisterine jáne fıtnes túrlerine úıretildi.

«Biz Arshaly aýdanymen jumysty jalǵastyra beretin bolamyz. Biz muǵalimderdiń bilim deńgeıin kótergimiz keledi. Olar sporttyq jarystarda belgili bir nátıjeler kórsete bastaǵan kezde basqa aýdandarǵa osy ádistemeni engizýge kóshemiz», - deıdi Coca-Cola Almaty Bottlers kompanııasynyń PR menedjeri Álıma Isembaeva.