Qazaqstannyń qorǵanys salasynda tolaǵaı tabystar M.Altynbaevtyń esimimen tikeleı baılanysty - Q.Jaqypov
ASTANA. QazAqparat - Táýelsiz Qazaqstannyń qorǵanys salasynda tolaǵaı tabystar M.Altynbaevtyń esimimen tikeleı baılanysty. Búgin Senatta kórnekti qaıratker, Halyq qaharmany, Armııa generaly, senator Muhtar Qapashuly Altynbaevtyń 70 jyldyq mereıtoıyna arnalǵan saltanatty shara barysynda sóz sóılegen Májilis spıkeri Qabıbolla Jaqypov osylaı málim etti.
«Bul torqaly toı Muhtar Qapashulynyń ǵana emes, jalpy Qazaqstan azamattarynyń aýyz toltyryp aıtarlyq erekshe qýanyshy. Óıtkeni, Muhtar Qapashuly at jalyn tartyp mingen kezden bastap, ushqysh bolsam degen asyl armannyń jetegine ilesip, oǵan jetip qana qoımaı, memleketimizdiń ıgiligine, beıbit ómiri men qaýipsizdigine ómirin arnady. El Táýelsizdigin alǵan qıyn kezeńde Elbasynyń úlken senimine ıe bolyp, Qazaqstan Qarýly Kúshteriniń jaýapty júgin arqalady. Jańa shańyraq kótergen jas memleketimizdiń irgesin qymtap, býynyn bekitýine aıanbaı atsalysty. Táýelsiz memleketimizdi qalyptastyrý isine belsene aralasyp, egemen elimizdiń tól áskerin qalyptastyrýǵa, qorǵanys júıesiniń nyǵaıýyna ólsheýsiz úles qosty. Bizdiń búgingi qorǵanys salasynda tolaǵaı tabystarymyz tikeleı Muhtar Qapashulynyń atymen baılanysty», - dedi Q.Jaqypov.
Májilis Tóraǵasy sonymen qatar Armııa generalynyń elge qyzmet kórsetýdegi qaıtalanbas úlgisin kórsetkenin atap ótti. Parlament depýtaty retindegi M.Altynbaevtyń ótkir oılary men batyl qadamdary da aıryqsha ekenine toqtaldy.
«Qazaq qashanda batyryn ardaqtap, azamatyn ulyqtaı bilgen tekti halyq. Sol tektilikti saqtap, bıigin alasartpaı, taý tulǵaly qalpysymen týǵan elimizdiń mereıin tasytyp júrgen ardaqty azamattyń biri - Muhtar Qapashuly», - deı kele Májilis spıkeri mereıtoı ıesine shapan japty.
