Qazaqstannyń qorǵanys ónerkásibi óndirisiniń kólemi artty
ASTANA. QazAqparat - Qorǵanys ónerkásiptik keshendegi 9 kásiporynda tehnologııalyq jańǵyrtý júrgiziledi. Búgin Parlament Májilisindegi Úkimet saǵatynda Qorǵanys jáne aeroǵarysh ónerkásibi mınıstri Beıbit Atamqulov osylaı málim etti, dep habarlaıdy QazAqparat.
«Statıstıka kórsetip otyrǵandaı, ótken jyly bizdiń kásiporyndarymyz jaqsy jumys istedi. Qorǵanys ónerkásibi óndirisiniń kólemi 2017 jyly 14 paıyzǵa artty, al eksport 2 esege ulǵaıdy», - dep toqtaldy mınıstr.
Onyń sózine qaraǵanda, jumys istegen ýaqyt ishinde mınıstrliktiń kúsh-jigeri salany údemeli damytý úshin ınstıtýtsıonaldyq jáne júıelik jaǵdaılar jasaýǵa baǵyttaldy.
«2030 jylǵa deıin Qarýly Kúshterdi qaıta qarýlandyrý jáne Qorǵanys ónerkásiptik keshendi damytý tujyrymdamasynyń jobasy ázirlendi (Prezıdent Ákimshiligine engizildi). Bul bizdiń kásiporyndarymyz ben zaýyttarymyzǵa ne beredi? Bul qujatty qabyldaý uzaq merzimdi jobalardy túzýge , ıaǵnı óndirisshilerimizdi áskerı jáne qosarlanǵan maqsattaǵy ónimniń zamanaýı túrlerin ıgerýge baǵdarlaýǵa múmkindik beredi», - dedi Atamqulov.
Onyń atap ótýinshe, taıaý jyldary eksporttyq áleýeti bar ónimniń perspektıvaly túrlerin shyǵarýǵa basty nazar aýdara otyryp, 9 kásiporynda tehnologııalyq jańǵyrtý júrgizý mindeti tur. Aldaǵy jylǵa 2 kásiporyndy jańǵyrtý josparlanǵan.
«Degenmen uzaq merzimge beriletin ári arzan nesıelerdiń jáne tetikterdiń joqtyǵy júrgizilip otyrǵan jańǵyrtýǵa negizgi táýekeldiń biri bolyp otyr. Damý ınstıtýty nemese ekinshi deńgeıli bank belgili bir shekteýlerge baılanysty qorǵanys ónerkásiptik keshen salasyn qarjylandyrmaıdy. Sol sebepten Memleket basshysynyń tapsyrmasy boıynsha Qorǵanys ónerkásiptik keshen damytý qory qurylýda. Qor kásiporyndaryn qoldaýdyń pármendi tetigi retinde jumys isteı bastaýy tıis», - dedi mınıstr.
