Qazaqstannyń kóptegen oblystarynda joǵary órt qaýpi saqtalady
ASTANA. QazAqparat - Qazaqstannyń basym bóliginde kún raıy ashyq bolady, soltústikte, soltústik-batysta ǵana atmosferalyq aǵyndardyń ótýimen aýa raıynyń turaqsyz sıpaty saqtalyp, keı jerlerde naızaǵaı oınap, jańbyr jaýady, jel kúsheıedi, dep habarlady QR TJM baspasóz qyzmeti «Qazgıdrometke» silteme jasap.
Soltústik-batysta keı jerlerde tuman túsedi. Aqmola, Soltústik Qazaqstan, Ońtústik Qazaqstan oblystarynda jeldiń ekpini 15-20 m/s-qa deıin jetedi.
Qostanaı oblysynda túnde keı jerlerde tuman túsedi. Kúndiz Jambyl oblysynda, keı jerlerde Almaty, Mańǵystaý, Atyraý, Qaraǵandy oblystarynda aptap ystyq bolady. Respýblıkanyń batysynda, ońtústiginde, keı jerlerde ońtústik-shyǵysynda jáne ortalyǵynda óte joǵary órt qaýpi saqtalady.
Taıaýdaǵy táýlikterde respýblıkanyń ońtústigindegi jáne shyǵysyndaǵy taý ózenderinde sýdyń qubylýy kútiledi, Batys Altaıdyń keı ózenderinde sý deńgeıi kóteriledi.
