Qazaqstannyń kóptegen oblystarynda aldaǵy úsh kúnde jańbyr jaýyp, kún kúrkireıdi
ASTANA. QazAqparat - Qazaqstannyń kóptegen oblystarynda aldaǵy úsh kúnde jańbyr jaýyp, kún kúrkireıdi, dep habarlaıdy «Qazgıdromet».
«Naǵyz kóktemgi kún raıy tek ońtústik oblystarda ǵana emes, Qazaqstannyń barlyq aýmaǵynda baıqalyp otyr. Túngi temperatýralardyń ózi jyly, al ońtústikte tipti +5, +10 gradýsty kórsetip otyr. Qazaqstan aýmaǵy boıynsha aýysyp otyrǵan ońtústik tsıklonmen birge aldaǵy úsh táýlikte kóptegen oblystarda jańbyr kútilip, jeldiń 13-20 m/s jyldamdyqpen soǵýy, keı jerlerde kún kúrkireýi kútilip otyr. Biraq bul tsıklonnyń Iran aýdandarynan ákelgen jyly jaýyn-shashyny bar, klımattyq normadan joǵary temperatýrany áli de saqtap qalady», delingen habarlamada.
