Qazaqstannyń kóppáterli úılerinde jeke basqarý organdary qurylýy múmkin

ASTANA. QazAqparat - Qazaqstanda árbir kóppáterli turǵyn úıdiń jeke basqarý organyn qurý usynysy talqylanyp jatyr, dep habarlaıdy QazAqparat tilshisi.

«Ár úıdiń óz basqarý organyn qurýdy usynyp otyrmyz. Onyń qandaı formada bolatynyn ázirge aıta almaımyn. Munda árbir birlestik óz tóraǵasyn tańdaıdy. Árıne, birlestikte tóraǵanyń qyzmetin qadaǵalaıtyn keńes qurylady jáne qyzmet kórsetetin kompanııalarmen kelisim ornatylady», - dedi «Turǵyn úı kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Turǵyn úı sharýashylyǵy departamentiniń dırektory Mádına Mýrsakına Astanada ótken «TKSh-EKSPO 2017» halyqaralyq forýmynda.

«Úı turǵyndary arasynan tóraǵa tabylmaǵan jaǵdaıda, árıne, basqarý organy syrttan úıdi basqarý jumystarymen aınalysatyn jeke tulǵany nemese basqarýshy uıymdy jaldaı alady», - dep óz sózin tolyqtyrdy sarapshy.

Onyń aıtýynsha, sarapshylar qoldanystaǵy zańnamadaǵy basqarý formalaryn qaıta qaraıdy.

«Basqarý organdarynyń qyzmetin retteý qorytyndysy boıynsha, ortaq basqarý nysandaryn tirkeýdi qamsyzdandyrýymyz qajet. Búginde tirkeý kórsetkishi óte tómen, 21 myń úı ǵana tirkelgen. Osy oraıda «bir úı - bir birlestik jáne bir esepshot» ustanymyz engizgimiz keledi. ıAǵnı, ár úıdiń óz aǵymdyq jáne jınaqtyq shoty bolady», - deıdi sarapshy.

Aıta keteıik, turǵyn úı-kommýnaldyq sharýashylyq salasyndaǵy qordalanyp qalǵan máselelerdi sheshý maqsatynda Úkimet bıyl turǵyn úı qatynastaryn jetildirý boıynsha aýqymdy reformany bastady. Reformalaý aıasynda Investıtsııalar jáne damý mınıstrligi janynan jumys toby quryldy. Jumys tobyna páter ıeleri kooperavtıvi qaýymdastyqtarynyń, óńirler men túrli mekemelerdiń jáne basqarýshy kompanııalardyń sarapshylary endi.