Qazaqstannyń Konstıtýtsııasyna Batys synshyl kózqaraspen qaraǵan edi- professor J.Busurmanov
Іs-shara barysynda elimizdiń bas qujaty - Konstıtýtsııanyń demokratııalyq bastamalardy iske asyrýdaǵy róli, adam quqyqtaryn qorǵaý jáne Konstıtýtsııa normalaryn jetildirý máseleleri talqylanady. Sondaı-aq Ata zańymyzdy ázirleý jumysyna qatysqan professor-ǵalymdar osy tarıhı kúnderden estelikter aıtty. «1995 jyly biz Konstıtýtsııanyń jańa nusqasyn qabyldaýdyń aldynda eki referendým ótkizgen bolatynbyz. Onyń biri Prezıdenttiń ókilettiligin uzartýǵa arnalǵan bolsa, ekinshi referendým el Konstıtýtsııasyn qabyldaýdy kózdegen edi. Sol kezde Batystyń birqatar elderi bizdiń bul bastamamyzdy synǵa aldy. Máselen, AQSh Memlekettik departamentiniń baspasóz hatshysy Nıkolson BUU-nyń minberinen sóılegen sózinde Qazaqstannyń bir jylda qatar ótkizgen eki referendýmyn synǵa alyp: «Onymen Qazaqstan demokratııadan eki qadamǵa shegindi», - dep aıtqan bolatyn. Osydan keıin kóptegen halyqaralyq forýmdar men keńesterde kóptegen elder AQSh-tyń ustanymyn qoldap, Qazaqstannyń Konstıtýtsııasyna jiti mán bergen joq. Shveıtsarııa bolsa, jylyna 20-dan astam referendýmdar ótkizedi. Nege ony demokratııadan 20 qadamǵa shegindi dep synamaıdy? Árıne, osynyń bári sol kezdegi Batystyń keńestik memleketterge ustanǵan saıasatyna tikeleı baılanysty bolǵan. Sondyqtan biz san alýan jınalystarda Ata zańymyz - Konstıtýtsııamyzdyń mán-mańyzyn barynsha ashyp, onyń bolashaqqa baǵdar alǵan mazmunyn jan-jaqty túsindirýge tyrystyq», - deıdi professor Jumabek Busurmanov.