Qazaqstannyń kondıterlik ónimderi Erevandaǵy kórmege qoıyldy

EREVAN. QazAqparat - Qazaqstannyń kondıterlik kompanııasy Erevandaǵy «Armenia Expo» halyqaralyq saýda-ónerkásip kórmesinde óz ónimderin usynyp jatyr, dep habarlaıdy «QazAqparat» HAA tilshisi.

7 qyrkúıek kúni Erevanda Armenııa prezıdenti A. Sarkısıannyń qatysýymen «Armenia Expo» 18-shi halyqaralyq saýda-ónerkásip kórmesi ashyldy. Oǵan túrli elderden taýarlar men qyzmetter naryǵynda kóshbasshy bolyp otyrǵan 170 kompanııa qatysyp otyr. Sonyń ishinde Qazaqstannyń «Rahat» kondıterlik kompanııasy da bar.

«Bul kórme ıgi dástúrge aınaldy. Biz ony Qazaqstan men Armenııa arasyndaǵy ekijaqty formattaǵy ári EAEO aıasyndaǵy ózara saýda-ekonomıkalyq baılanystardyń jańa joldaryn izdeýge múmkindik beretin alań retinde qarastyramyz», - dedi Qazaqstan Respýblıkasynyń Armenııadaǵy elshisi T. Orazaev.

Eki kúnge sozylatyn sharalar aıasynda jekelegen pavılondar men ekspozıtsııalarda qurylys, týrızm, qarjy, aýyr jáne jeńil ónerkásip salalarynyń, azyq-túlik sektorynyń ónimderi men qyzmetteri usynylyp otyr.

Kórme 9 qyrkúıek kúni aıaqtalady.