Qazaqstannyń kompanııalary Jumore.com saýda alańyna tegin shyǵa alady - «Atameken» palatasy
ASTANA. QazAqparat - Búgin Astanadaǵy «Kórme» ortalyǵynda ashylǵan otandyq taýar óndirýshilerdiń kórmesi aıasynda sheteldik elektrondy saýda platformalary óz stendterin ashty. Sol arqyly qazaqstandyq kásiporyndar kórshi elderdiń naryǵyna shyǵa alady. Aıta ketken jón, elektrondy saýda platformalary kórmege alǵash ret qatysyp otyr, dep xabarlaıdy QazAqparat tilshisi.
«Mysaly, Jumore.com elektrondy saýda platformasyna 70-ke jýyq qazaqstandyq kompanııa óz taýarlaryn tirkep úlgerdi. Jyldyń aıaǵyna deıin bir myńdaı otandyq taýar atalǵan platformaǵa shyǵarylady degen jospar bar. Jumore.com - ol kóterme saýda alańy. Ol jerde álemniń 160 memleketi saýda-sattyq júrgizedi. Al aqshanyń bir jyldyq aınalymy 200 mlrd dollardy quraıdy. Sondyqtan atalǵan platforma otandyq taýar óndirýshiler úshin jańa múmkindikter ashyp otyr», - dedi «Atameken» UKP basqarma tóraǵasynyń orynbasary Nurjan Áltaev «Uly Dala eli» forýmynyń ashylý rásiminde.
Onyń aıtýynsha, Jumore.com platformasyna tirkelý aqyly negizde júrgiziledi. Alaıda Qazaqstannyń taýar óndirýshileri jyldyń aıaǵyna deıin oǵan tegin tirkele alady.
Aıta keteıik, otandyq taýar óndirýshilerdiń kórmesi aıasynda «Zoodel» atty taǵy bir elektrondy saýda platformasy da óz stendin ashty. Sol jerde barlyq aqparatty alýǵa bolady. Kórmege elimizdiń 350 kompanııasy qatysyp jatyr. Olardyń barlyǵy 6000 sharshy metrdi alyp turǵan eki úlken zalda ornalasty.
https://kaz.inform.kz/news/otandyk-tauar-ondirushiler-korme-aymagyna-syymay-kaldy_a3049555
