Qazaqstannyń kommýnıstik halyq partııasy qańǵybastar týraly zań qabyldaýdy usyndy

KÓKShETAÝ. QazAqparat - Elimizde qańǵybastar týraly zań qajet. Bul týraly Kókshetaýda «Halyqtyń áleýmettik jaǵynan osal toby. Pandemııa kezinde týberkýlezdiń taralý máselesi, qaýpi, táýekeli» taqyrybymen ótken dóńgelek ústel barysynda talqylandy, dep habarlaıdy QazAqparat tilshisi.

Qazaqstan kommýnıstik halyq partııasynyń Aqmola oblystyq fılıaly men «Igilik» qoǵamdyq qory birlesip ótkizgen jıynǵa qazaqstandyq jáne sheteldik úkimetti emes uıymdary, oblystyq jáne qalalyq ákimdikter, basqarma ókilderi, medıtsına qyzmetkerleri qatysyp, týberkýlezdiń aldyn alý jáne azaıtý máselesin talqylady.

Jıynda qańǵybastar týraly zań qabyldaý jóninde usynys aıtyldy.

«Ár vedomstvo óz jumysyn ózinshe júrgizedi. Alaıda, vedomstvolar arasynda úılestirý jetispeıdi. Máselen, densaýlyq saqtaý salasyndaǵylar naýqastardy emdep shyǵaryp, áleýmettik ortaǵa jiberedi. Keıin bul adamdarǵa eshkim qaramaıdy da, qaıta naýqastanady. Sóıtip, bári qaıtadan basynan bastalady. Sol sebepti barlyq vedomstvolar men úkimettik emes uıymdardyń, zańdy jáne jeke tulǵalardyń basyn biriktiretin zań qajet», - deıdi QKHP Aqmola oblystyq fılıalynyń tóraǵasy Oljas Syzdyqov.

Partııa ókilderiniń aıtýynsha, sońǵy kezderi qańǵybastardyń sany artqany baıqalady. Kókshetaýdaǵy beıimdeý ortalyǵy 50 adamǵa shaqtalǵandyqtan qys merziminde oryn bola bermeıdi.

Jıynǵa qatysýshylar ár aýdanda osyndaı uıym ashyp, beıimdeý qyzmetiniń jumysyn úılestirý týraly usynys jasady.