Qazaqstannyń kólik saqtandyrý naryǵy jańa ónimmen tolyqty

Ony "NOMAD Inshýrans" saqtandyrý kompanııasynyń Basqarma tóraǵasy Rınat Ahmetıanov búgin Almatyda ótkizgen baspasóz máslıhatynda aıtty.

Buǵan deıin saqtandyrý kompanııalary Qazaqstanda klıentterge saqtandyrýda avtomobıl paıdalanýda 4 táýekel tobyn ǵana usynyp kelgen bolatyn. Olar - jol kólik oqıǵasy, urlyq, tabıǵat apaty jáne aıdap ketý. Al ózge damyǵan elderde kólik buzylýdan saqtandyrý qyzmeti burynnan bar jáne ol saqtandyrýdyń jetkilikti deńgeıde keń taraǵan túri bolyp sanalady. Endi Qazaqstannyń saqtandyrý naryǵynda ınnovatsııalyq jańa ónim bolyp tabylatyn kólikti buzylýdan saqtandyrýdy eń alǵashqy bop "NOMAD Inshýrans" saqtandyrý kompanııasy usyndy.

"Bul ıdeıa tutynýshylardyń ótinishinen týyndap otyr. Bizdiń kompanııamen aı saıyn 40 myń saqtandyrý kelisimin jasaǵan adam baılanys jasaıdy. Olarmen qarym-qatynas kezinde biz suranysy men táýekelderi týraly bızneste eń qundy aqparattardy alamyz. Ázirge bul jańa ónim jalpy buqaralyq bolmaıdy. Óıtkeni eldegi avtomobıl parkiniń 60 paıyzyn shyǵarylǵanyna 10-jyldan asqan kólikter quraıdy. Biz ázirge 2005 jyldan keıin shyǵarylǵan jáne Qytaı men Reseıden basqa elderdiń avtokólikterin ǵana saqtandyramyz", - deıdi R. Ahmetıanov. Al "MASS Kazakhstan" kompanııasynyń Basqarýshy dırektory Danıel Orazbekovtyń aıtýynsha, buzylýdan saqtandyrý, ıaǵnı mehanıkalyq synýdaǵy kepildendirilgen tóleý qyzmeti AQSh-ta 30 jyldan beri, al TMD elderinde 5 jyldan beri qoldanylyp kele jatyr. Jóndeý jáne kólik quraldaryna tehnıkalyq jáne kepildendirilgen qyzmet kórsetýmen aınalysatyn amerıkandyq "MACS" kompanııasy 4 jyl buryn Ýkraınadaǵy ókildigin ashqan edi. Byltyr Qazaqstanda jumys jasaýǵa kelisim jasaldy. "Qazaqstannyń avtomobıl jáne avtoservıs naryǵy qozǵalysty túrde damýda. Alaıda damýdyń kójıegi áli óte zor. Oǵan joǵary kásibı servıs stansalarynyń azdyǵy da aıqyn dálel bola alady", - dedi D. Orazbekov.