Qazaqstannyń qoǵamdyq kelisim men ulttyq birlik tájirıbesin álemniń 50-den astam memleketi alýda (FOTO)

ASTANA. QazAqparat - Búgin Qazaqstannyń strategııalyq zertteýler ınstıtýty QR Prezıdenti janyndaǵy Ulttyq jańǵyrtý komıssııasy jumys tobynyń sarapshylarymen birge prezıdenttik reformalardy talqylaýǵa qatysty kezdesýler toptamasyn bastady.

Joba aıasynda búgin Qazaqstan halqy Assambleıasy Tóraǵasynyń orynbasary Eraly Toǵjanovpen kezdesý ótti.

«Ózderińizde biletindeı Qazaqstan halqy Assambleıasynyń janynan ǵylymı-saraptamalyq keńes qurylǵan bolatyn. Onyń jumys istep jatqanyna 5 jyldan astam ýaqyt ótti. Sonymen qatar Qazaqstannyń árbir oblysyndaǵy joǵary oqý oryndarynda QHA kafedrasyn ashtyq», - dedi ol.

E.Toǵjanovtyń atap ótýinshe, QHA kafedralaryn ashýdaǵy negizgi maqsat - eń aldymen JOO-lar bilim alyp jatqan, orta oqý oryndarynda oqıtyn azamattardyń elimizdiń birlik saıasatyn túsiný.

«Birinshiden, elimizge 50-den astam memlekettiń kelip, alyp jatqan tájirıbemizdi eń aldymen jastarymyz bilýi qajet. Ekinshiden, Qazaqstan bir kúnniń ishinde kópetnosty ult bolyp qalyptasqan joq. Sondyqtan onyń qalyptasý tarıhyn da búgingi jastarymyz, halqymyz bilýi kerek, bul baǵytta atqarylyp jatqan saıasatymyzdy túsinýi qajet», - dep qosty QHA Tóraǵasynyń orynbasary.

Onyń atap ótýinshe, memlekettik qyzmette jasaıtyn barlyq azamat qoǵamdyq kelisim men ulttyq birlik máselesine oraı arnaıy daıyndyqtan ótýi tıis. Ol úshin Memlekettik qyzmet akademııasy janynan arnaıy ortalyq ta qurylǵan. Atalǵan ortalyqtan 3 jyldyń ishinde 2700-ge jýyq azamat dáris aldy.