Qazaqstannyń qoǵamdyq birlestikteri «Qazaqstan - 2020» jalpyulttyq demokratııalyq kúshter koalıtsııasyna qosyldy
Esterińizge sala keteıik, atalǵan koalıtsııa QR Tuńǵysh Prezıdenti - Elbasy N. Nazarbaevtyń ókilettigin uzartý týraly referendým ótkizýdi jaqtaıdy.
Atap aıtqanda, quramynda respýblıkanyń 500-den astam úkimettik emes uıymdary bar Qazaqstannyń Azamattyq Alıansy, Qazaqstannyń kásipker áıelder odaǵy, «Baýyrjan» respýblıkalyq qaıyrymdylyq qory, sybaılas jemqorlyqpen kúres jónindegi prezıdent baǵdarlamasyn qoldaýdyń qoǵamdyq komıteti atalǵan koalıtsııaǵa qosylatyndyqtaryn jarııalady. «Biz, Qazaqstannyń qoǵamdyq uıymdar ókilderi referendým ótkizý jónindegi bastamany tolyq qoldaımyz. Ony qoǵam men memlekettiń evolıýtsııalyq damý protsesiniń zańdylyǵyna sáıkes oryn alyp otyrǵan ári óz ýaqytyndaǵy mańyzdy shara dep sanaımyz», - dedi baspasóz máslıhatynda Parlament Májilisiniń depýtaty, Azamattyq alıans basshysy Aıgúl Soloveva.
Sonymen qatar, qoǵamdyq uıym ókilderi elimizdegi azamattyq qoǵamnyń damý úderisin tikeleı Elbasy N. Nazarbaevtyń esimimen baılanystyrady. Máselen, Alıans basshysynyń aıtýynsha, Elbasynyń tikeleı bastama jasaýymen respýblıkada 4 márte Azamattyq Forým bolyp ótti. Bundaı ıgilikti sharanyń nátıjesinde bılik pen úkimettik emes uıymdar arasyndaǵy áriptestik mehanızmderi engizilip, ol óz jemisin bere bastady.
Esterińizge sala keteıik, keshe «Nur Otan» HDP Elbasy Nursultan Ábishuly Nazarbaevtyń ókilettigin uzartý bastamasy boıynsha referendým ótkizý úshin «Qazaqstan - 2020» jalpyulttyq demokratııalyq kúshter koalıtsııasyn uıymdastyrǵan edi. Bul koalıtsııa Prezıdenttiń ókilettigin uzartý bastamasy boıynsha referendým ótkizýdi qoldap, osy referendýmdy júzege asyrýǵa baılanysty barlyq sharalardy qolǵa alatyn bolady.
