Qazaqstannyń kiristi kásiporyndaryna 248,5 mln dollar bólinedi
«Jer qoınaýyn paıdalaný salasynda 2021 jyldyń qorytyndysy boıynsha energetıka sektoryndaǵy jer qoınaýyn paıdalanýshylardyń taýarlaryn, jumystary men kórsetiletin qyzmetterin satyp alýdyń jalpy kólemi 4,69 trln teńgeni qurady. Jergilikti qamtý úlesiniń ortasha salalyq kórsetkishi 2,9 trln teńge somasyna 61,8 paıyz boldy. Onyń ishinde: taýarlar - 24,3, jumystar - 76,4, kórsetiletin qyzmetter - 53,6 paıyz. Jalpy, satyp alý kóleminiń shamamen 75 paıyzy 3 iri operatorǵa – Teńizshevroıl, Qarashyǵanaq Petroleým Opereıtıng jáne Nort Kaspıan Opereıtıngke, 13 paıyzy «Samuryq-Qazyna» qorynyń kompanııalar tobyna jáne 12 paıyzy qalǵan jer qoınaýyn paıdalanýshylarǵa tıesili», - dedi mınıstr.
Osy rette Bolat Aqsholaqov taýarlardaǵy jergilikti qamtý úlesin ulǵaıtýǵa múmkindikter bar ekenin, ol úshin mınıstrlik eki bastamany iske asyrǵanyn aıtty.
«Birinshi, «Shevron» kompanııasy óziniń respýblıka aldyndaǵy qaıta ınvestıtsııalaý mindettemeleri aıasynda Qazaqstannyń kiristi kásiporyndaryna 248,5 mln AQSh dollaryn bólýdi qarastyryp otyr. Ekinshi, «Munaı-gaz mashınasyn jasaýdy damytýdyń halyqaralyq ortalyǵy» quryldy. Ol 3 iri operatordyń muqtajdyǵy úshin jergilikti taýarlardy damytý boıynsha jumys júrgizýde. Búgingi tańda ortalyq úsh taýar toby: tıek armatýrasy, baqylaý-ólsheý aspaptary men avtomatıka jáne elektr-tehnıkalyq jabdyq boıynsha óndiristi oqshaýlaý boıynsha jumystardy bastady. Taıaýdaǵy 10 jylda osy taýar toptary qajettiliginiń jalpy somasy 400 mln AQSh dollaryn quraıtyn bolady», - dedi ol.
Mınıstrdiń dereginshe, ortalyq osy taýar toptaryna mamandandyrylǵan elimizdiń 13 óńirindegi 60 zaýytty aralap, 35 myńnan astam taýardy taldaǵan. Onyń ishinde 19 taýar túri jaqyn bolashaqta operatorlar neǵurlym talap etetin taýarlar retinde aıqyndaldy.
«2022 jyldyń birinshi jartyjyldyǵynyń sońyna deıin operatorlar 9 kelisimshart berýin kózdeıtin jol kartasy bekitildi. Búgingi tańda 4 óndirýshimen kelisimder jasalyp, olar Qazaqstandyq seriktestermen jobalardy iske asyrýdy bastady. Bul Honeywell – gaz detektorlaryn, temperatýra túrlendirgishterin jáne basqarý júıeleriniń shkaftaryn óndirý, Petrol Valves - bekitý armatýrasyn óndirý, Sigma Solutions - elektr taratý qoraptarynyń jańa óndirisi jáne elektr jylytý júıeleriniń óndirisi jáne Elektro Serve - sorǵylar, azot generatorlary jáne elektrlik aınalmaly mashınalar óndirisi. Atalǵan jobalardan kútiletin nátıje - shamamen 4,9 mlrd teńge ınvestıtsııa tartý jáne 300 jańa jumys ornyn qurý. Sonymen qatar, ortalyq qazirgi ýaqytta operatorlarmen birge oqshaýlaýǵa arnalǵan kelesi taýarlyq toptardy anyqtady: tehnologııalyq súzgiler, sorǵylar men tyǵyzdaǵyshtar, qubyr ónimderi, jylý, jeldetý jáne aýany baptaý júıesi. 37 otandyq taýar óndirýshi qazirdiń ózinde olardy oqshaýlaýǵa múddeligin bildirdi», - dedi mınıstr.
