Qazaqstannyń kıno salasyndaǵy qoltańbasy eshkimge uqsamaıdy - reseılik akter Evklıd Kıýrdzıdıs
; ALMATY. Mamyrdyń 14-i. QazAqparat /Názıra Eleýhan/ - Qazaqstan kınematografııasynyń bolashaǵy zor jáne Qazaqstannyń kıno salasyndaǵy qoltańbasy eshkimge uqsamaıdy.
Bul týraly búgin Almatyda «Sháken juldyzdary» halyqaralyq kınofestıvaldiń qurmetti qonaqtarynyń qatysýymen ótken baspasóz máslıhatynda Reseıdiń eńbek sińirgen ártisi, kıno jáne teatr aktery Evklıd Kıýrdzıdıs málimdedi, dep habarlaıdy QazAqparat.
Onyń aıtýynsha, búgingi kúni múldem kıno túsirmeı jatqan Baltyq jaǵalaýy elderine qaraǵanda Qazaqstan óte kóp kıno túsirýde. «Daǵdarysqa qaramastan, Qazaqstanda kıno óndirisi qarqyndy damyp jatyr. Jáne jas kıno mamandarynyń talpynysy artqandyǵy baıqalady. Qazir bul daǵdarys ásirese, bıylǵy - 2010 jyly bárine qatty tııýde. Biz daǵdarystan shyǵý joldaryn qarastyryp jatqanda, Qazaqstan bul jaǵdaıdan shyǵyp úlgerdi», dep atap ótti Evklıd Kıýrdzıdıs.
Ol sonymen qatar, «Jaqsy kıno - jaqsy jazylǵan stsenarııden týady. Meniń oıymsha, jaqsy stsenarıster Qazaqstanda bar. Men jaqynda Reseıde qazaqstandyq týyndy «Qosh bol, Gúlsary» fılmin kórdim. Maǵan óte qatty unady. Jalpy men qazaq kınosyn jaqsy kóremin», dedi akter.
