Qazaqstannyń kileń jastardan qurylǵan konkıshiler komandasynyń bolashaǵynan zor úmit kútýge bolady - komandanyń bas bapkeri
ASTANA. 6 aqpan. QazAqparat /Aıdar Ospanalıev/ - «7-qysqy Azııa oıyndarynda Qazaqstannyń atynan konkımen júgirýden óner kórsetken komandanyń bolashaǵynan zor úmit kútýge bolady.
Óıtkeni onyń quramyndaǵy sportshylardyń barlyǵy áli jas jáne olar ýaqyt ótken saıyn jetilip keledi», - dedi osy sport túrinen elimizdiń bas bapkeri Vadım Saıýtın. Bul týraly ol 7-qysqy Azııa oıyndarynyń aıasynda konkımen júgirýden ótken jarystan soń jýrnalıstermen bolǵan baspasóz máslıhatynda málim etti.
Bas bapkerdiń sózinshe, qazaqstandyq komanda 3 jyldan soń Sochıde ótetin olımpıada oıyndaryna qatysady. Onda jastar ózderin jaqsy jaǵynan kórseteri sózsiz. Óıtkeni kileń jastardan qurylǵan komanda músheleri jyldan-jylǵa nyǵaıyp keledi. Al Sochıdegi olımpıadada olar álemniń myqty degen sportshylarymen synǵa túsip, shynyǵa túseri anyq. «Búgingi jarysqa keletin bolsaq, «Alaý» sport kesheninde ótken jarystar osynda óner kórsetken sportshylardyń esterinde qalatyny sózsiz. Mundaǵy jarystar sátti ótti. Elimizdiń komandasy bul joly 5 medaldi jeńip aldy», - dedi bas bapker.
Onyń sózine qaraǵanda, osyǵan deıingi Azııa oıyndarynda Qazaqstan komandasy bir ǵana qol medaldy qanaǵat tutsa, bul joly 1 altyn, 2 kúmis, 2 qola júldege qol jetkizip otyr. «Komanda múshelerine keletin bolsaq, konkımen júgirýden Ekaterına Aıdovanyń shyn mánindegi joǵary deńgeıdegi sportshy ekenin aıta ketý kerek. Ol jasóspirimder arasynda óner kórsetip júrgen bolashaǵynan zor úmit kúttiretin sportshy. Ol jyl saıyn óziniń sheberligin shyńdap, qazir eresekterdiń arasynda da senimdi óner kórsetetin jaǵdaıǵa jetti. Bul joly ol júldeli orynǵa ıe bola almady. Degenmen onyń jeńiske jetýine bolmashy ǵana ýaqyt jetpedi», - dedi V.Saıýtın.
Onyń pikirinshe, eger jarys sportshy qyzdyń ózi ábden mashyqtanǵan 1 myń metr qashyqtyq boıynsha ótkende sportshymyzdyń baǵy janary sózsiz edi. «Al erler arasyndaǵy komandaǵa keletin bolsaq, munda biz barlyq derlik jarys túrleri boıynsha júldeli oryndardy aldyq. Ókinishke oraı, biz altynǵa tek 1 myń 500 metr qashyqtyqtaǵy jarysta ǵana qol jetkizdik. Denıs Kýzın munda óziniń jankeshtiligin kórsetti. Óıtkeni ol olımpıada chempıonynyń ózin shań qaptyryp, Azııa rekordyn bekitti. Dmıtrıı Babenko 2 kúmis medaldyń ıegeri atandy. Ol uzaqqa shapqandy unatatyn sportshy. Sondyqtan bolar, osy joly oǵan osyǵan deıingi Azııa oıyndarynyń chempıony bolǵan japonııalyq Hırako Hıroktyń ózi qarsy tura almady. Ókinishtisi, biz komandalyq esepte altyndy ala almadyq. Biz qolany qanaǵat tutyp, 3 sekýndan sál ǵana asatyn ýaqytqa keshiktik», - dedi bapker.
