Qazaqstannyń kil myqty boksshy qyzdary Şýchede baq synaýda
KÓKShETAÝ. QazAqparat - Aqmola oblysynyń Şýche qalasynda Qazaqstan Respýblıkasyna eńbegi sińgen sport sheberi, London Olımpıadasynyń qola júldegeri Marına Volnovanyń júldesi úshin áıelder arasynda bokstan halyqarlyq týrnır ótýde, dep habarlaıdy QazAqparat tilshisi.
Aqmola oblysy Dene shynyqtyrý jáne sport basqarmasy baspasóz qyzmetiniń málimeti boıynsha, «Jaqsy» sport kesheninde ótip jatqan baıraqty jarysqa Qazaqstan, Úndistan, Ýkraına, Reseı, Qyrǵyzstan, Vetnam jáne Qytaı elderinen barlyǵy 82 bylǵary qolǵap sheberi baq synaýda. Medaldar jıyntyǵy toǵyz salmaq sanaty boıynsha sarapqa salynýda.
Alǵashqy bolyp, sharshy alańǵa shyqqan 2016 jylǵy Álem chempıony Dına Jolaman 54 keli salmaqta Gúlmıra Baımanovadan aılasyn asyra bildi. Sonymen qatar Karına Ibragımova men Rımma Volosenko da alǵashqy kezdesýlerin jeńispen aıaqtady. Al 60 keli salmaqtaǵy Nazym Işanova jeńilis tapty. Búgin sondaı-aq eki dúrkin Álem chempıony Nazym Qyzaıbaı (51 keli) óner kórsetedi.
Jalpy bul týrnırde sharshy alańǵa QR ulttyq quramasy sapyndaǵy boksshy qyzdardyń kil myqtylary shyǵady dep josparlanǵan. Týrnır 7 naýryzǵa deıin jalǵasatyn bolady.
Aıta keteıik, Marına Volnova Berik Marjyqpaevtyń jeteksheligimen talaı bıikti baǵyndyrǵan. Onyń álemdik áıelder boksyna sińirgen eńbegin Qazaqstannyń boks federatsııasy men AIBA ǵana emes, sondaı-aq Halyqaralyq olımpıada komıteti de atap ótýde. Bıylǵy jyldyń basynda Marınanyń Halyqaralyq olımpıada komıtetiniń basshysy Tomas Bahtyń qoly qoıylǵan arnaıy dıplommen marapattalýy sonyń aıqyn dáleli.
Qyzylorda oblysynyń týmasy Marına Volnova qyzdar arasynda Olımpıada oıyndarynyń júldegeri bolǵan tuńǵysh boksshy.
