Qazaqstannyń kıeli jerleriniń qatarynda Bókeı handyǵy da bar - Aıbolat Qurymbaev

ORAL. QazAqparat - Elbasy Nursultan Nazarbaevtyń «Egemen Qazaqstan» gazetinde jaryq kórgen «Bolashaqqa baǵdar: rýhanı jańǵyrý» atty maqalasynda aıtylǵan «Qazaqstannyń qasıetti rýhanı qundylyqtary» nemese «Qazaqstannyń kıeli jerleriniń geografııasy» jobasy kerektigin tolyqtaı qoldaımyn. Osynda kıeli jerler qataryna Batys Qazaqstan oblysyndaǵy Bókeı ordasy da kiredi. Bul týraly batysqazaqstandyq ólketanýshy, «SAYAT» etno-týrıstik ortalyǵynyń dırektory Aıbolat Qurymbaev málim etti, dep habarlaıdy «QazAqparat» tilshisi.

Onyń aıtýynsha, osynyń bári «Týǵan jer» baǵdarlamasynan týyndaıdy. «Týǵan jerdeı jer bolmas, týǵan eldeı el bolmas», degen dana halqymyz óz eli men jerin qadirleı bilgen. Qazirgi ýaqytta jetkinshek urpaq álem elderi men olardyń astanalaryn, jer-sý ataýlaryn jaqsy biledi, shet elderge saparlap baryp kelip jatqandary da bar. Al keıbireýleri óz týǵan jeriniń tarıhyn, toponımıkasyn, tabıǵaty men kıeli oryndaryn bile bermeýi múmkin. Mundaı málimetter aıtylmaı, óskeleń jas óz ólkesimen jete tanyspaǵannan keıin onyń oı-óresi shektelip qalady, tipti basqa bir álemde júrýi yqtımal. Sondyqtan «Týǵan jer» baǵdarlamasyn júzege asyrýdyń mańyzy zor. Qazaqstandyq patrıotızmdi óz halqynyń mádenıeti men salt-dástúrlerin, týǵan jerdiń tarıhyn tanyp, bilý arqyly jasóspirimderdiń boıyna sińirýge bolady.
 

«Qazaqstannyń qaı óńirinde bolmasyn, kıeli oryndar men qasıetti rýhanı qundylyqtar osy kezge deıin saqtalǵan. Sonyń biri - kezinde kishigirim memleket ispettes bolǵan Bókeı handyǵy. Kúni búgin Bókeı ordasy tarıhı-mýzeılik kesheni men «Bókeı ordasy» geobotanıkalyq qoryqshasy bar. Atalmysh keshenge qarasty tarıhı ǵımarattar men oryndar qalpyna keltirilip, olardy tamashalaýǵa jylyna 15 myńnan astam adam kelýde. Bıyl Astanada ótetin «EKSPO-2017» halyqaralyq kórmesine osy keshen týrıstik baǵyt retinde engizilip otyr. Bókeı ordasy - bizdiń ulttyq kodymyzdyń osy kúnge deıin saqtalǵanynyń aıqyn kórinisi. Bul rette Han ordasy aýylynda áli de qalpyna keltirýdi qajet etetin tarıhı úıler bar ekendigin aıta ketkimiz keledi. Sonymen qatar babalar egip ósirgen ormannyń qatary seldiremeı, qaıta kóbeıe tússe, qandaı keremet bolar edi. Kezinde Bókeı sultan bastap, Edil men Jaıyq aralyǵyna kóship, osy jerdi qazaq úshin saqtap qalsa, ony baıandy etý - keıingi urpaqtyń qasıetti boryshy. Elbasymyz aıtqandaı, «Ómir súrý úshin ózgere bilý kerek. Oǵan kónbegender tarıhtyń shańyna kómilip qala beredi». Endeshe, elimizdiń jarqyn keleshegi úshin ótkenimizdi umytpaı, búginimizdi bıiktetip, erteńimizdi asqaqtata bilýimiz qajet», dep túıindedi oıyn Aıbolat Qurymbaev.