Qazaqstannyń kıeli jerleriniń kartasy bir-eki aıda daıyn bolady - mınıstr Muhamedıuly
ASTANA. QazAqparat - QR Mádenıet jáne sport mınıstri Arystanbek Muhamedıulynyń aıtýynsha, karta aldymen albom úlgisinde shyǵady, dep habarlaıdy QazAqparat tilshisi.
«Qazirgi kezde atalǵan karta boıynsha jumys tobyn jasaqtap jatyrmyz. Abyroı bolǵanda, bizde ólketanýshylar men geograftar qaýymdastyqtary bar. Budan bólek, ózdigimen ekspedıtsııaǵa shyǵyp júrgen ǵalymdarymyz da az emes. Al naqty kıeli jerlerdiń kartasy jaıynda aıtar bolsaq, jyldyń aıaǵyna deıin biz atalǵan kartanyń albomyn daıyndap shyǵaramyz. Árıne, biz ony elektrondy formatqa da aýystyratyn bolamyz»,- dedi Muhamedıuly jýrnalısterge bergen suhbatynda.
Onyń aıtýynsha,Qazaqstannyń kıeli jerleriniń kartasyn jasaýǵa kóp aqsha ketpeıdi. Mınıstrlik barlyq shyǵyndardy óz bıýdjetinen óteıdi. «Kartany jasap shyǵarý úshin aqsha emes, aqparat kóp kerek. Árıne, árbir tarıhı jerdiń ańyz-áńgimelerin jaza bersek,oǵan ýaqyt ta, kartanyń kólemi de jetpeıdi. Sondyqtan aıshyqty ári qyzyqty degen jerlerdi iriktep alǵanymyz jón. Endi, aldaǵy bir-eki aıdyń ishinde biz ol kartanyń elektrondy nusqasyn kórsete alamyz», - dep atap kórsetti mınıstr.
Aıta keteıik , Qazaqstanyń kıeli jerleriniń kartasy Memleket basshysynyń «Bolashaqqa baǵdar: rýhanı jańǵyrý» atty maqalasynda aıtylǵan negizgi ıdeıalardy júzege asyrý aıasynda qolǵa alynyp otyr. «Osy turǵyda, Prezıdent Ulytaý tórindegi jádigerler keshenin, Qoja Ahmet ıAsaýı mavzoleıin, Tarazdyń ejelgi eskertkishterin, Beket ata kesenesin, Altaıdaǵy kóne qorymdar men Jetisýdyń kıeli mekenderin jáne basqa da jerlerdi ózara sabaqtastyrýdy tapsyrdy. Atalǵan jerlerdiń barlyǵy - bizdiń ulttyq biregeıligimizdiń keregesi», - deıdi mınıstr Muhamedıuly.
