Qazaqstannyń kıeli jerlerine onlaın rejımde sapar jasaımyz - Berik Ábdiǵalıuly
«Mine, búgin biz sol kitaptardyń tusaýkeserin jasap otyrmyz. Jalpyulttyq jáne aımaqtyq kıeli jerlerdiń tizimi eki bólek kitap retinde alǵash ret jaryqqa shyqty. Bul - bizdiń ortaq eńbegimiz. Arnaıy saraptamalyq keńeske engen belgili ǵalymdar, qoǵam qaıratkerleri árbir nysandy keńinen talqyǵa saldy. Aımaqtardan jiberilgen tizimniń 90 paıyzy endi. Osy jumystardy áli de jalǵastyrý qajet. Biz kıeli jerlerdi anyqtadyq. Endigi maqsat - sonyń barlyǵyn keńinen nasıxattaý», - deıdi «Kıeli Qazaqstan» ǵylymı-zertteý ortalyǵynyń basshysy Berik Ábdiǵalıuly
Onyń aıtýynsha, qazirgi kezde jaryqqa shyqqan kitaptardyń elektrondyq nusqasy ázirlenip jatyr.
«Búginde aımaqtyq kıeli jerlerdiń tizimi ınteraktıvti kartaǵa engizilip otyr. Al jalpyulttyq kıeli jerler boıynsha kópfýnktsıonaldy 3D týry bar karta jasalýda. Bul ortaq karta bolady. Oǵan ekeýi de (jalpyulttyq jáne aımaqtyq nysandar - avt.) kiredi. Bolashaqta barlyǵyna 3D kire alatyndaı jasaımyz degen oıymyz bar. Árbir azamat qaıda júrse de, Qazaqstanda ma, shetelde me, kartaǵa kirip, baratyn jerin bassa, jolyn da kórsetip beredi, ańyzyn da aıtyp beredi. Bunyń barlyǵy uıaly qosymsha úlgisinde jumys isteıdi», - dep atap kórsetti B.Ábdiǵalıuly.
Aıta keteıik, jalpyulttyq mańyzy bar kıeli jerler týraly jınaq úsh tilde jaryq kórdi. Taralymy - 1000 dana. Aımaqtyq nysandarǵa arnalǵan jınaqtyń da tarylymy sondaı. Biraq atalǵan kitap qazaq jáne orys tilderinde basyldy. Budan bólek, Qazaqstannyń kıeli jerleri boıynsha arnaıy entsıklopedııa shyǵaryldy. Ony tarylymy - 2000 dana. Oǵan Astana men Aqmola oblysynda, sondaı-aq Almaty men Almaty oblysynda ornalasqan tarıxı nysandar endi. Búgingi forým aıasynda Ulttyq mýzeıde "Rýxanı jańǵyrý" zaly ashyldy. Sondaı-aq, Áziret Sultan men Qarazan keshenderiniń 3D úlgisi kórsetildi.
