«Qazaqstannyń kıeli jerleri» jobasyna Jambyl óńiriniń 8 tarıhı orny usynyldy

ASTANA. QazAqparat - «Qazaqstannyń kıeli jerleriniń geografııasy» jobasyna Jambyl óńirinen 8 tarıhı oryn usynyldy. Bul týraly búgin Ortalyq kommýnıkatsııalar qyzmetindegi brıfıngte Jambyl oblysynyń ákimi Kárim Kókirekbaev málim etti, dep habarlaıdy QazAqparat.

«Búgingi kúni oblysta «Rýhanı jańǵyrý» baǵdarlamasyn sapaly iske asyrý boıynsha pármendi sharalar qabyldanǵan. Óńirlik jobalyq keńsemen «Tárbıe jáne bilim», «Rýhanı qazyna», «Atameken» kishi baǵdarlamalaryna 73 joba engizildi. Rýhanı jańǵyrýǵa negiz - bizdiń óńir tarıhynda ejelden bar ónege. Onyń dáleli retinde Elbasynyń bastamasymen Astanadan bastaý alyp, 2000 jyldan astam tarıhy bar kóne Taraz jerinde jalǵasqan Qazaq handyǵynyń 550 jyldyǵyn aıtýǵa bolady. Qazaq handyǵynyń 550 jyldyǵy - tarıhymyzda ulttyq kod ekeni anyq», - dedi ol.

Kárim Kókirekbaevtyń aıtýynsha, «Qazaqstannyń kıeli jerleriniń geografııasy» jobasyna oblystyń 8 kıeli orny anyqtalyp, usynylǵan. Olardyń qatarynda Merke-Jaısan túrki ǵuryptyq kesheni, Aqyrtas bekinisi, «Ejelgi Taraz qalashyǵy», Tekturmas kesheni, Qarahan kesenesi, Aısha bıbi kesenesi, Babajy Hatýn mazary jáne «Baızaq batyr Mámbetuly» kesenesi bar.

«Oblystyń tarıhy, mádenıeti men kıeli oryndary týraly 11 serıaly derekti fılm túsirildi. «Jambyl oblysynyń óneri men qol sheberliginiń entsıklopedııasy» shyǵaryldy. Aǵymdaǵy jyly Bektóbe, Georgıevsk, Tamdy, Saýdakent ortaǵasyrlyq qalashyqtarynda arheologııalyq qazba jumystary júrgizilýde. Aqyrtas qalashyǵynyń týrıstik ınfraqurylymy keńeıtildi. Osyndaı ınfraqurylym 6 nysanǵa júrgiziletin bolady», - dedi oblys basshysy.