Qazaqstannyń kıeli jerler tizimi qandaı ólshemder negizinde jasaldy

ASTANA. QazAqparat - Qazaqstannyń kıeli jerlerin tizimge alý jumystary jalǵasady. Bul týraly búgin Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat.

«Qazaqstanda kıeli jerlerdiń kóp ekendigi barshańyzǵa belgili. Bul kıeli jerlerdiń tizimine olardyń barlyǵyn qospaı memleket pen ulttyń tarıhynda úlken ról atqarǵan, halyqtyń sanasynda  qalǵan jáne jıi baratyn, halyqtyń áleýmettik-saıası ómirinde mańyzdy oryn alatyn kıeli jerlerdi ǵana qostyq. Negizinen kıeli jerleri mynadaı ólshemder  negizinde jasaldy: tabıǵı landshafty nysandar, arheologııalyq jáne sáýlet eskertkishteri, ǵıbadat oryndary sanalatyn dinı nysandar, tarıhı tulǵalarmen, saıası oqıǵalarmen baılanysty kıeli oryndar»,  -  dedi mınıstr.

Onyń aıtýynsha, kıeli jerlerdi irikteý, tizimge alý júıeleý jumystary elimizde tuńǵysh ret qolǵa alynyp otyr.

«Osyǵan baılanysty olardy tizimge  alý máselesinde birshama qıyndyqtar boldy. Sondyqtan Elbasy Nursultan Nazarbaevtyń kıeli jerlerdi túgendeýge qatysty eskertýleri nazarǵa alynyp, aldaǵy ýaqytta bul baǵyttaǵy jumystarymyzdy jetildire túsetin bolamyz», - dedi ol.

Sonymen qatar mınıstr sońǵy 7 aıda atqarylǵan jumystarǵa toqtaldy.

«Kıeli nysandardy irikteý jáne tizimge alý boıynsha metodıkalyq usynystar  ázirlenip, óńirlerge joldandy, árbir  óńirde kıeli jerlerdi anyqtaý boıynsha jumys toptary quryldy. Qazaqstannyń barlyq óńirindegi kıeli jerlerge etno-mádenı ekspedıtsııalar uıymdastyryldy. Kıeli jerlerdiń kópfýnktsıonaldy-vırtýaldy kartasy jasaldy. Osyndaı tarıhı-mádenı muramyzdy aýqymdy júıeleýdiń nátıjesinde jalpy halyqtyq mańyzy bar 100 keshenniń jáne  óńirlik mańyzy bar 456 nysannyń tizimi qalyptastyryldy. Nysandardy tizimge alý jumystary odan ary jalǵasatyn bolady», - dedi Arystanbek Muhamedıuly.