«Qazaqstannyń kıberqalqany» tujyrymdamasynyń alǵashqy qorytyndysy shyǵaryldy
ASTANA. QazAqparat - QR Qorǵanys jáne aeroǵarysh ónerkásibi mınıstri Beıbit Atamqulovtyń tóraǵalyǵymen 2022 jylǵa deıingi «Qazaqstannyń kıberqalqany» kıberqaýipsizdik tujyrymdamasyn júzege asyrýdyń birinshi qorytyndysyn jasaýǵa arnalǵan keńeıtilgen jınalys ótkizildi, dep habarlaıdy QazAqparat tilshisi atalǵan vedomstvoǵa silteme jasap.
Sharaǵa QR Qorǵanys, Bilim jáne ǵylym, Іshki ister mınıstrligi, Ulttyq qaýipsizdik komıteti, QR Prezıdenti janyndaǵy memlekettik basqarý akademııasy, Halyqaralyq aqparattyq tehnologııalar ýnıversıteti, «Kazahtelekom» AQ, «Transtelekom» AQ baılanys operatorlary, Kıber shabýyldy taldaý jáne tergeý ortalyǵy jáne Qazaqstandyq aqparattyq qaýipsizdik qaýymdastyǵy ókilderi qatysty.
Negizgi nátıjeleri mynadaı: zańnamany qalyptastyrý, tehnıkalyq standarttar men talaptardy mindetti túrde qoldaný salasyn keńeıtý, kásibı standartty bekitý, bilim berý granttaryn kóbeıtý, memlekettik qyzmetkerlerdiń saýattylyǵyn arttyrý jáne aqparattyq-kommýnıkatsııalyq tehnologııalardy qoldaný kezindegi qaýipsizdik sharalary týraly azamattardy habarlandyrý boıynsha júıelik jumysty uıymdastyrý.
Sondaı-aq, jınalysta sarapshylyq qoǵamdastyqpen qazaqstandyq ázirleýshilerdiń mamandandyrylǵan sheshimderin qurý jáne kommertsıalızatsııalaý, «onlaın» servıster jáne elektrondyq memlekettik kórsetiletin qyzmetter kóleminiń ósý jaǵdaıyndaǵy kıberqaýipsizdik salasyndaǵy buzýshylyqtardyń aldyn-alý jáne kompıýterlik shabýyldar kezinde ózara is-qımyldy uıymdastyrýdaǵy baılanys operatorlarynyń rólin arttyrý boıynsha birqatar jańa bastamalar shyǵaryldy jáne talqylandy.
