«Qazaqstannyń kıberqalqany» tujyrymdamasy ázirlendi
ASTANA. QazAqparat - «Qazaqstannyń kıberqalqany» kıberqaýipsizdik tujyrymdamasy ázirlendi. Bul týraly búgin Ortalyq kommýnıkatsııalar qyzmetindegi brıfıngte QR Qorǵanys jáne aeroǵarysh ónerkásibiniń vıtse-mınıstri Dmıtrıı Golobýrda málim etti, dep habarlaıdy QazAqparat.
«Qazaqstannyń kıberqalqany» kıberqaýipsizdik tujyrymdamasynyń jobasy ázirlendi. Jumys toby tujyrymdama jobasyn ázirleý barysynda aqparattyq-kommýnıkatsııa tehnologııalaryn qoldanýdaǵy jetekshi eldermen qatar áleýmettik damý jolynda ony qoldaný aıasyn keńeıtýge umytylyp otyrǵan damýshy elderdiń de tájirıbelerin zerdeledi. Kıberqaýipsizdik múldem jańa túsinik sanalady jáne kópshilikke tanylǵan, naqty halyqaralyq anyqtamasy joq», - dedi Dmıtrıı Golobýrda.
Onyń atap ótýinshe, tujyrymdama maqsaty jahandyq básekege qabilettilik jaǵdaıynda Qazaqstannyń turaqty damýyn qamtamasyz etetin, elektrondyq aqparattyq resýrstar, aqparattyq júıeler men aqparattyq-kommýnıkatsııalyq ınfraqurylymyn syrtqy jáne ishki qaýipterden qorǵalýyna qol jetkizý jáne sol deńgeıde ustaý bolyp sanalady.
«Tujyrymda eki kezeńmen júzege asyrylady. Birinshi kezeń 2017-2018 jyldardy, al ekinshi kezeń 2019-2022 jyldardy qamtıtyn bolady», - dedi ol.
Golobýrdanyń aıtýynsha, birinshi kezeńde aqparattyq qaýipsizdikti qamtamasyz etý salasyndaǵy belgilengen talaptardy saqtaýdyń tolyq quqyqtyq qoldaný tájirıbesi qalyptasady. Onyń nátıjeleri boıynsha zańnamaǵa tıisti ózgertýler engiziledi. Otandyq zerttemeler jasaýda ónerkásip pen ǵylym arasyndaǵy ózara is-qımyl men kooperatsııalaýdyń tıimdi syzbasy jolǵa qoıylady. Ekinshi kezeńde qazaqstandyq ІT-kompanııalardyń ulttyq aqparattyq-kommýnıkatsııalyq ınfraqurylymdy qaýipsizdik júıeleri jumystaryna qatysýyna múmkindik beriledi.
