Qazaqstannyń keden qyzmeti eksportqa emes ımportqa jumys isteıdi - sarapshy

ASTANA. QazAqparat - QR Prezıdenti Ákimshiligi janyndaǵy Strategııalyq zertteý men taldaý ortalyǵy meńgerýshisiniń orynbasary Oljas Joraevtyń aıtýynsha, elimizde ekport pen ımport salasyndaǵy kedendik operatsııalar kezinde dısbalans barynsha baıqalady, dep habarlaıdy QazAqparat tilshisi.

«Máselen, damyǵan memleketterde eksport pen ımporttyń kedendik rásimderi birkelki júrgiziledi. Al Qazaqstandaǵy kedendik rásimder ımporttyq taýarlardy jeńil ótkizse, eksportqa, kerisinshe, tosqaýyl bolyp jatady. Sonyń saldarynan qazaqstandyq taýarlar halyqaralyq naryqtarǵa shyǵa almaıdy», - dedi Oljas Joraev búgin eksportty damytýǵa arnalǵan jıynda.

Onyń aıtýynsha, kólik-logıstıka ınfraqurylymynyń sapasyz bolýy da eksport kólemine keri áserin tıgizip otyr. Kásipkerler úshin jol shyǵyndary keı kezde taýardyń sońǵy baǵasynyń 30 paıyzyn alyp jatady. Ondaıda otandyq taýarlar qymbatqa satylady da, ózge elderdiń ónimderimen básekege túse almaıdy.

Aıta keteıik, búgingi jıynda «Qazaqstannyń memlekettik-jekeshelik seriktestik ortalyǵy» AQ basqarma tóraǵasy Azamat Oınarov ta sóz sóılep, Qazaqstandy sheteldik brendterdi jamylǵan reseılik taýarlardyń jaýlap alǵanyn jetkizdi.