Qazaqstannyń Keden komıteti shekaradaǵy beketterin bir ortalyqtan baqylap otyratyn boldy

ASTANA. 24 qatar. QazAqparat - Búgin QR Qarjy mınıstrliginiń Kedendik baqylaý komıteti Senat depýtattaryna jańa monıtorıngilik ortalyqty tanystyrdy.

Bul ortalyq eki bólimnen turady. Olardyń birinshisi - baılanys ortalyǵy. Bir sózben aıtqanda, ol kádimgi call-ortalyqtyń qyzmetin atqarady. Osyndaǵy biryńǵaı nómirge syrtqy ekonomıkanyń qatysýshylarynan qońyraýlar túsip otyrady. Ekinshisi - jedel basqarý ortalyǵy. Ol keden beketterin beınebaqylaý kameralary arqyly tekserip otyrýǵa arnalǵan arnaıy jabdyqtarmen qamtylǵan.

«Biz bıyl ıntellektýaldy beınebaqylaý júıesin engizýdi josparlap otyrmyz. ol júıe keden beketterinde oryn alatyn zańǵa qaıshy is-áreketterdi der kezinde anyqtaıtyn bolady. Máselen, avtokólik keri baǵytqa ketip bara jatsa, nemese kólikter men adamdar qalyptan tys kóp mólsherde jınalyp qalsa, monıtorıngilik ortalyqqa dabyl kelip túsedi. Odan otyrǵan qyzmetkerler sol kezde tıisti shara qoldanady», - dedi KBK basqarma bastyǵy Nurbek Naýryzbaev.

Aıta ketý kerek, 20 elektrondyq ótkizý pýnktisi, 30 taýarlardy jetkizýdi baqylaýdyń avtomattandyrylǵan júıeleri, 22 ýaqytsha saqtaý qoımalary, 23 kólikti skanerleıtin ınspektsııalyq tekserý kesheni jáne taǵy da basqa júıeler monıtorıngimen qamtylǵan.