Qazaqstannyń qazirgi tarıhy jaıly fılm túsirý kerek - Aqan Sataev

NUR-SULTAN. QazAqparat - Belgili qazaqstandyq rejısser ári prodıýser Aqan Sataev «Rýhanı jańǵyrý» baǵdarlamasynyń keleshegi týraly óz pikirimen bólisti, dep habarlaıdy QazAqparat tilshisi.

«Búgin «Rýhanı jańǵyrý» baǵdarlamasy aıasynda birshama josparlar talqylandy. Alda aýqymdy jumystar kútip tur. Sol sebepti, nátıjeni dál erteń kútýdiń qajeti joq. Sebebi, bul jobalardyń bári de bolashaqqa arnalǵan. Onyń nátıjesi elimizdegi árbir azamatyna baılanysty bolady», - dedi rejısser «Rýhanı jańǵyrý» baǵdarlamasyn júzege asyrý boıynsha Ulttyq komıssııanyń otyrysynda.

Onyń aıtýyna qaraǵanda, memleket pen azamattar bir-birimen úzeńgilese otyryp, alǵa qaraı qadam basýy kerek.

«Barymyzdy baǵalaı bilýimiz kerek. Álemde bári de alǵa qaraı jyljyp bara jatqan ýaqytta artqa qaraılaı bergenimiz jaramaıdy. Árbir azamat óz memleketinen birdeńeni kútip otyrmaı, óz eline ne beremin degen oıdy da umytpaýy tıis», - deıdi rejısser.

Aqan Sataevtyń aıtýynsha, álemdegi ózge elderdegideı Qazaqstanda da kınematograf salasynyń mańyzy óte zor.

«Otyrys barysynda qazirgi ýaqytta adamdardyń ókinishke qaraı, az oqyp, kóbine tyńdaýdy jáne tamashalaýdy qolaı kóretini aıtylyp qaldy. Mine, sondyqtan mádenıette kınematograf salasyna basa kóńil bólinedi. Osynaý jumysty jan-jaqty júrgizý kerek dep esepteımin», - deıdi ol.

Rejısser óz sózinde qazirgi tańda «Tumar» fılmi boıynsha jumys júrgizilip jatqanyn tilge tıek etti.

«Týyndy montajdaý satysyna taıap qaldy. «Tumardan» bólek, meniń áriptesterim birshama tarıhı fılmderdi túsirip jatyr. Biraq, aldaǵy ýaqytta basymdyq tarıhı oqıǵalarǵa berilip qana qoımaı, qazirgi tarıhymyz týraly týyndy túsirýge umtylýymyz kerek. Osylaısha durys basymdyqtar men mádenı qundylyqtardy nasıhattaımyz», - deıdi rejısser.

Eske sala ketsek, búgin Aqordada Qazaqstan Respýblıkasy Prezıdentiniń janyndaǵy «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysy ótti.

Foto: brod.kz