Qazaqstannyń qazirgi saılaý naýqanynyń ereksheligi, onyń tynysh sıpatta ótýi - Belarýs baıqaýshysy

ASTANA. QazAqparat - Qazaqstannyń qazirgi saılaý naýqanynyń ereksheligi, onyń tynysh sıpatta ótýi. Búgin QR Ortalyq saılaý komıssııasynda ótken brıfıngte Belarýs Respýblıkasy Saılaý jáne respýblıkalyq referendýmdar ótkizý jónindegi ortalyq komıssııasynyń tóraıymy Lıdııa Ermoshına osylaı dedi.

«Menińshe, erekshelikterdiń biri saılaý naýqanynyń jáne oǵan daıyndyq sharalarynyń tynysh sıpatta órbýi bolyp otyr», - dedi ol BAQ ókilderiniń saýalyna oraı.

Onyń atap ótýinshe, Qazaqstannyń saılaý naýqany óte joǵary deńgeıde uıymdastyrylyp, shtattyq rejimde júrgizilýde.

«Birinshiden, ol óte jaqsy uıymdastyrylǵan. Kezekten tys saılaý ótkizilgende uıymdastyrý sharalary zor mánge ıe bolady. Ekinshiden, ádistemelik qujattar jaqsy daıyndalǵan. Ony Ortalyq saılaý komıssııasy qabyrǵasynda ilingen qujattardan baıqaýǵa bolady. Bul mamandardyń joǵary deńgeıde jumys isteıtindigin bildiredi. Dál qazirgi kezeńde QR Ortalyq saılaý komıssııasyna 100-ge jetpeıtin shaǵymnyń túsýi de tań qaldyrady. Óıtkeni, Belarýsta ótken saılaýlardyń barlyǵynda da saılaý ótkizgen sátten bastap birneshe júzdegen shaǵym túsedi. Daýys bergennen keıin de oǵan shamamen 500 shaǵym qosylady», - dedi L.Ermoshına.